ئەمڕۆ پێنجشەممە، وەزارەتی پەروەردەی عێراق، ڕایگەیاند کە لە ماوەی شەش مانگی یەکەمی ساڵی ٢٠٢٦دا، توانیویانە بڕی زیاتر لە ملیارێک و نیو دینار بۆ خەزێنەی دەوڵەت بگەڕێننەوە.
لە ڕاگەیەندراوێکی وەزارەتەکەدا هاتووە: “بەڕێوەبەرایەتیی گشتیی کاروباری یاسایی لە وەزارەت، بە سەرپەرشتی و بەدواداچوونی ڕاستەوخۆی عەبدولکەریم عەبتان جبووری، وەزیری پەروەردە، پێشکەوتنێکی بەرچاوی لە دۆسیەی گەڕاندنەوەی پارە و کۆکردنەوەی قەرزە حکومییەکان بەدەستهێناوە.”
ڕاگەیەندراوەکە ئاماژەی بەوەش کردووە کە ئەم کارە لە ڕێگەی تەواوکردنی ڕێکارەکانی دۆسیەی قەرەبووکردنەوە و جێبەجێکردنی ڕاسپاردەکانی لیژنە لێکۆڵەرەکان بووە، کە بە هەماهەنگی لەگەڵ بەڕێوەبەرایەتییە گشتییەکانی پەروەردە لە بەغدا و سەرجەم پارێزگاکان ئەنجام دراوە.
بەپێی ئامارە وردەکانی شەش مانگی یەکەمی ساڵی ٢٠٢٦، دوای تەواوکردنی هەموو ڕێکارە یاسایی و کارگێڕییە پێویستەکان، بڕی ١ ملیار و ٧٢٨ ملیۆن و ٣٧٧ هەزار و ٨٠٠ دینار گەڕێندراوەتەوە.
لە کۆتایی ڕاگەیەندراوەکەدا، وەزارەتی پەروەردە جەختی کردووەتەوە کە پرۆسەی وەرگرتنەوەی شایستە داراییەکان بەپێی چوارچێوە یاساییەکان بەردەوام دەبێت، ئەمەش وەک پەرۆشییەک بۆ پاراستنی ماڵی گشتی و چەسپاندنی مافەکانی وەزارەت.