توێژینەوەیەکی نوێ و بەرفراوان کە لەسەر زیاتر لە ۳۷۱ هەزار هاووڵاتیی ئەمریکی ئەنجام دراوە دەریخستووە، خواردنی خودی میوە بە بەراورد لەگەڵ خواردنەوەی شەربەتی چڕکراوەی میوەکان، کاریگەرییەکی باشتر و بەرچاوتری لەسەر پاراستنی تەندروستیی دڵ هەیە.
هەرچەندە توێژینەوەکانی پێشوو ئاماژەیان بەوە کردووە لە شێوازی گشتیدا خواردنی میوە لە شەربەتەکەی بەسوودترە، بەڵام جیاوازیی وردی نێوان کاریگەریی ئەم دووانە لەسەر تەندروستیی دڵ ڕوون نەبوو. بۆ لێکۆڵینەوە لەم بابەتە، توێژەران بەراوردیان لە نێوان ڕادەی خواردنەوەی شەربەتی سروشتی و خواردنی میوە لەگەڵ ئەگەری تووشبوون بە نەخۆشییەکانی دڵ لە نێو بەشداربوواندا کردووە.
زانایان لەم توێژینەوەیەدا پشتیان بە داتاکانی ساڵی ۲۰۱۹ی «سیستەمی چاودێریی هۆکارە مەترسیدارە ڕەفتارییەکان» (BRFSS) بەستووە، کە ڕاپرسییەکی تەلەفۆنیی بەردەوامە لە ئەمریکا. لە کۆی ۳۷۱ هەزار و ۳٨ بەشداربوو کە زیاتر لە نیوەیان ژن بوون، کێشەی تەندروستیی بەشداربووان کرا بە دوو بەشەوە: ئەوانەی هۆکارەکانی وەک بەرزیی پەستانی خوێن و کۆلیسترۆڵیان تێدایە، و ئەوانەی پێشینەی نەخۆشییەکانی دڵ و لوولەکانی خوێنیان وەک جەڵتەی دڵ، سەکتەی مێشک یان تەنگەژەی دڵیان هەبووە.
بەپێی ئەنجامەکان، بەشداربووان بە تێکڕا ڕۆژانە ۱.۰٦ جار میوە و ۰.۳ جار شەربەتیان خواردووەتەوە. دەرکەوتووە ئەو کەسانەی پەستانی خوێنیان بەرز بووە یان تووشی جەڵتە و کێشەکانی دڵ بوون، زیاتر لە کەسانی تەندروست شەربەتی میوەیان خواردووەتەوە. تەنیا لەو بەشداربووانەدا جیاوازی هەبوو کە کێشەی کۆلیسترۆڵیان هەبووە، کە کەمتر لە کەسانی ئاسایی شەربەتیان بەکارهێناوە.
هاوکات توێژەران بۆیان دەرکەوتووە ئەو کەسانەی دووچاری کێشەکانی دڵ و هۆکارە مەترسیدارەکانی بوونەتەوە، بە بەراورد لەگەڵ کەسانی ئاسایی زۆر کەمتر خودی میوەیان خواردووە.
ئەم ئەنجامانە، کە لە گۆڤاری «Current Developments in Nutrition» بڵاو کراونەتەوە، دوای ڕەچاوکردنی فاکتەرەکانی تەمەن، نەتەوە، ئاستی خوێندەواری، داهات و جگەرەکێشان، هێشتا بە نەگۆڕی ماونەتەوە و پیشانی دەدەن پەیوەندیی نێوان شەربەت و نەخۆشییەکانی دڵ زۆر ئاڵۆزە.
سەرەڕای ئەوەی بەهۆی نەبوونی بەدواداچوونی چەندین ساڵە و پشتبەستن بە وتەی کەسیی بەشداربووان ناتوانرێت پەیوەندیی هۆکار و دەرئەنجام بە تەواوی بسەلمێنرێت، بەڵام زانایان هۆشداری دەدەن کە ئەو کەسانەی تەندروستیی دڵیان خراپتر بووە کەمتر میوەیان خواردووە؛ بۆیە پێویستە توێژینەوەی زیاتر بۆ دۆزینەوەی میکانیزمی ئەم کاریگەرییە و هاندانی خەڵک بۆ خواردنی زیاتری میوە ئەنجام بدرێت.