رێبەری باڵای كۆماری ئیسلامی ئێران، بە فەرمی رایگەیاند، محەمەد موخبیر، جێگری سەركۆماری ئێران، بەپێی مادەی 131 دەسەڵاتەكانی سەركۆمار وەردەگرێت، هەروەها دەبێ لە ماوەی 50 رۆژدا، هەڵبژاردنی سەرۆكایەتیی كۆمار لەوڵاتدا بەڕێوە بچێت.
ئەمڕۆ دووشەممە 20ی ئایار، عەلی خامنەیی، رێبەری باڵای كۆماری ئیسلامی ئێران، سەخۆشیی خۆی لە گەلی ئێران، بۆ گیان لەدەستدانی ئیبراهیم رەئیسی، سەركۆماری ئێران و حوسێن ئەمیر عەبدوڵڵاهیان وەزیری دەرەوەی ئێران و یاوەرانیان دەربڕی.
هەر بۆیە پێنج رۆژ ماتەمینی گشتی لە وڵاتە لەلایەن رێبەری كۆماری ئیسلامی ئێرانەوە راگەیەنرا.
خامنەیی، ئەوەی راگەیاندووە، بەپێی مادەی 131ی دەستوور، محەمەد موخبیر، جێگری یەكەمی سەكۆماری ئێران، دەسەڵاتەكانی جێبەجێكردنی وڵات وەردەگرێت، رێبەری كۆماری ئیسلامی ئێران، دووپاتی لەوە كردووەتەوە، كە محەمەد موخبیر، لەگەڵ دەسەڵاتەكانی یاسادانان و دادوەری هاوئاهەنگی بكات، بۆئەوەی لە ماوەی 50 رۆژ هەڵبژاردنی سەرۆكایەتیی كۆمار لەو وڵاتدا بەڕێوە بچێت.