سەرەڕای سپاندنی کۆمڵێک گەمارۆی توند بۆسەر ئێران، بەرهەمهێنانی نەوتی ئەم وڵاتە لە ساڵی ڕابردوودا گەشەی بەرچاوی تۆمار کرد و گەیشتە زیاتر لە سێ ملیۆن و ٦٠٠ هەزار بەرمیل لە ڕۆژدا، بەڵام بەپێی دوایین ئاماری ڕێکخراوی نێودەوڵەتیی وزە و ڕێکخراوی ئۆپێک لە بەهاری ئەمساڵەوە بەرهەمهێنانی نەوتی ئەو وڵاتە جارێکی دیکە کەم بووەتەوە.
ڕێکخراوی نێودەوڵەتیی وزە بڵاویکردووەتەوە، بەرهەمهێنانی نەوتی ئێران لە مانگی تەمووزدا ڕۆژانە سێ ملیۆن و ٣٥٠ هەزار بەرمیل بووە، بەپێی ئاماری ڕێکخراوی ئۆپێکیش لە هەمان مانگدا ڕۆژانە سێ ملیۆن و ٢٧٠ هەزار بەرمیل بووە.
بەر لە سزاکانی ئەمریکا بەرهەمهێنانی ڕۆژانەی نەوتی ئێران سێ ملیۆن و ٨٠٠ هەزار بەرمیل بوو، لە سەردەمی سەرۆکایەتیی دۆناڵد ترامپدا دابەزی بۆ خوار دوو ملیۆن بەرمیل و بە هاتنە سەرکاری جۆ بایدن جارێکی دیکە زیادی کردەوە.