رۆژی پێنجشەممە 31ی تشرینی یەکەمی 2024، لە شاری هەولێر سەرۆک مەسعود بارزانی بەشداری لە دەیەمین کۆنگرەی پزیشکی میزۆپۆتامیا کرد، ئەم کۆنگرەیە کە پزیشکانی کورد لە هەموو پارچەکانی کوردستان و تاراوگە تیایدا بەشداربوون ئامانج لێی زیاتر بەرەوپێشەوە بردنی ئاستی زانستی پزیشکی و کەرتی تەندروستییە لە هەرێمی کوردستاندا.
لەم کۆنگرەیەدا سەرۆک مەسعود بارزانی وتارێکی پێشکەشکرد، دەقی وتاری سەرۆک بارزانی؛
بە ناوی خوای گەورە و میهرەبان
بەڕێزان هەمووتان بەخێربێن سەر سەر و سەرچاوان.
زۆر خۆشحاڵم ئەمڕۆكە بەشدارم لەم كۆنگرەیەدا و لە خزمەتی ئێوەدام، دەستخۆشیتان لێ دەكەم و داوای سەركەوتنتان بۆ دەكەم.
ئەهمیەتی ئەم كۆنگرەیە یەكجار زۆرە و هەبوونی ئەو هەموو دكتۆر و زانایە سەرمایەیەكی گەورەیە بۆ نەتەوەی كورد و دەرخەری ئەوەیە كە ئەگەر تاكی كورد دەرفەتی هەبێت، هیچی كەمتر نییە لە تاكی تر.
ئێمە كاتێك كە دەبیستین كوڕێكی كورد لە فڵان وڵاتی دەرەوە دكتۆرێكە گەیشتۆتە ئاستێك ناوبانگی دەركردووە، لێرەوە شانازی پێوە دەكەین و هەست بە سەربەرزییەكی گەورە دەكەین.
خۆشبەختانە زۆر لەو رۆڵانەی ئێستا لێرە دانیشتوون، ناوبانگێكی زۆر زۆر باشیان دەركردووە و توانیویانە بە دەستە زێڕینەكانی خۆیان خزمەتی زۆری هەم مرۆڤایەتی بكەن و هەم ناوی كوردیش بەرز بكەنەوە.
بێگومان كەرتی تەندروستی زۆر زۆر گرنگە بۆ هەموو كۆمەڵگەیەك، بۆ هەموو نەتەوە و وڵاتێك، لە ساڵانی رابردوو ئیهتیمامێكی زۆر بە كەرتی تەندروستی دراوە، بەڵام لەمەودواش ئێمە ئومێدەوارین كە گرنگییەكی زیاتری پێ بدرێت و تەمەننا دەكەم هەولێر و هەموو شارەكانی تری كوردستان وایان لێبێت خەڵكەكە موحتاجی ئەوە نەبن بچن لە دەرەوە چارەسەر وەربگرن، بەڵكوو هەموو پێویستی لێرە فەراهەم بكرێت بۆ ئەوەی خەڵكی ئێمە نە تووشی ئەو خەرجییە زۆرە ببێ، نە تووشی ئەو زەحمەتییە ببێ، بەڵكوو لێرە چارەسەری نەخۆشییەكانی بكات و من لەو باوەڕەدام كە دكتۆری ئێمە ئەو كەفائەتەیان هەیە و دەتوانن، پێویستە ئەو ئامرازە تازانەی لە رووی پزیشكییەوە دەرچوون، ئەمانە هەمووی دابین بكرێت و خەڵكی ئێمە ئیتر ناچار نەبن بۆ چارەسەر بچنە دەرەوە.
بەڕێزان هەمووتان بیستتان كە پێش چەند ڕۆژێك هەڵبژاردنێكی مێژوویی لە كوردستان لە رۆژی 20ی مانگ ئەنجامدرا، ئەوەی ئێمە شانازی پێوە دەكەین كە ئەو هەڵبژاردنە لە كەش و هەوایەكی زۆر زۆر ئارام و ئازاد دا ئەنجام درا و هیچ گرفتێكی وا رووی نەدا، كە زۆر كەس تەسەوڕیان دەكرد گرفتی زۆر گەورە بێتە پێشەوە و ببێتە هۆی ئەوەی كە ئەسڵەن هەڵبژاردن نەكرێت. وشەكانی پێش هەڵبژاردن و ئەوەی دوای هەڵبژاردن هی زۆر لا وەكوو یەك نەبوو، بەڵام بەهەرحاڵ ئێستا هەڵبژاردن كراوە و ئەنجامەكانیش ئیعلان كران، ئیتر كاتی ئەوەیە كە گفتوگۆ بكرێت لە نێوان هەموو لایەنەكان و پێوەریش ئیستحقاقی ئینتیخابی بێت و لە هەمووی گرنگتر ئەوەیە كە حكوومەتی داهاتوو و دۆخی هەرێم بۆ داهاتوو دەبێ لەسەر ئەم بنەمایانە بێت:
یەك هەرێم
یەك پەرلەمان
یەك حكوومەت
یەك هێزی پێشمەرگە
هەروەها بەجددی رێگری بكرێت لەو كارە نایاساییانەی كە دەكران، وەكوو دروستكردنی كارخانەی ماددەی هۆشبەر یان بازرگانیكردن بە ماددەی هۆشبەر یان تیرۆر، یان لادان لە یاسا، دەبێ سنوورێك بۆ ئەم شتانە دابنرێت، دەبێ یاسا سەروەر بێت.
حكوومەتی داهاتوو، هەرچەندە لە كابینەی نۆیەم و پێشتریش هەموو هەوڵێكیان داوە كە خزمەتگوزاریی باش پێشكەش بە وڵاتەكە بكەن، بەڵام ساڵ بۆ ساڵ هەم ئەزموونەكە زیاتر دەبێت، هەم ئیمكانیاتیش زیاتر دەبێت، من پێموایە كاتی ئەوە هاتووە ئیتر بیر لە پلانی ستراتیژی بكرێتەوە، لە سەرووی هەموویشی دەبێ كەرتی تەندروستی بگاتە ئاستێكی زۆر بەرز، هەروەها پەروەردە، كشتوكاڵ، گەشتوگوزار. ئێمە بەرەو ئەوە بچین ئیعتیماد لەسەر خۆمان بكەین. بەڵێ نەوت گرنگە، بەڵام نەوت ئەمڕۆ یان سبەینێ تەواو دەبێ، بەڵام كشتوكاڵ تەواو نابێ، گەشتوگوزار تەواو نابێ، ئەمە لە رووی ئابوورییەوە.
من وای دەبینم لە ئاییندەیەكی نازانم چەند دوور و نزیك، بەڵام كێشەی ئاو دەبێتە كێشەی سەرەكی و لە قورئانی پیرۆزیشدا هاتووە (وَجَعَلْنَا مِنَ الْمَاءِ كُلَّ شَيْءٍ حَيٍّ)، ژیان سەخت دەبێت بەڵام دەتوانی بێ كارەبا بژیت، دەتوانی بێ ئۆتۆمبێل بژی، بەڵام بێ ئاو ناتوانی بژی.
من دەستخۆشی لە حكوومەتی هەرێم دەكەم كە لەم دواییانە گرنگییەكی زۆریان بە بەنداو داوە، بەڵام لەمەودوا دەبێ ئەمە یەكێك بێ لە ئەولەویاتی ئیشوكاری حكوومەتی هەرێم، چونكە مەسەلەی ئاو مەسەلەیەكە بە هیچ شێوەیەك كەمتەرخەمی تەحەمول ناكات و قەبووڵیش ناكات. ئینشائەڵا تووشی ئەو قەیرانە نابین، بەڵام هەموو پێشبینییەك وایە كە لە ئاییندەدا مەسەلەی ئاو دەبێتە كێشەیەكی زۆر گەورە.
هەروەها ئامانج ئەوەیە كە چارەسەری هەموو گرفتەكان لەگەڵ بەغدا بەپێی دەستوور و بەپێی ئەو ڕێككەوتنانەی كە هەیە. ئەوەی كە جێی دڵخۆشییە بۆ ئێمە. لەم دواییانە بیستمان كە دەستپێشخەرییەك هەیە بۆ پرۆسەی ئاشتی لە توركیا، ئومێدەوارین كە سەربگرێت و كەس كۆسپی بۆ دروست نەكات.
هەموو كەس دەتوانێ قسە بكات، بەڵام شەرت كردارە، وتەیەكی عەرەبی هەیە زۆر جوانە دەڵێ (رحم الله امرأً عرف قدر نفسه).
جارێكی تر من بەخێرهاتنی هەمووتان دەكەم، تەمەننای سەركەوتنتان بۆ دەكەم، ئەركی ئێوە ئەركێكی پیرۆزە و ئێوە جێگەیەكی تایبەتتان هەیە لە دڵی میللەتدا، چونكە ئێوە خزمەتی مرۆڤایەتی دەكەن، دەستەكانی ئێوە پیرۆزن و دەستتان خۆش بێت.
زۆر سوپاس
