وەزارەتی شارەوانی و گەشتوگوزاری حكوومەتی هەرێمی كوردستان، ڕاگەیاندراوێكی بڵاو كردەوە و تێیدا ئاماژە بەوە دراوە، لەسەر ڕێژەی 15%ی داهاتی سەرۆكایەتیی شارەوانیی هەولێر، گوژمەی 460 ملیۆن دینار بۆ كردنەوەی شەقامە سەرەكییەكانی گوندی كۆری خەرج دەكرێت.
ئەمڕۆ یەكشەممە 10/11/2024، وەزارەتی شارەوانی و گەشتوگوزار، ڕاگەیاندراوێكی بڵاو كردەوە، تێیدا هاتووە: “لە فەرمانێكی وەزاریی وەزارەتی شارەوانی و گەشتوگوزاردا بە واژۆی ساسان عەونی، وەزیری شارەوانی و گەشتوگوزار، ڕەزامەندی نیشان درا لەسەر خەرجكردنی گوژمەی 460 ملیۆن دینار و 999 هەزار دینار بۆ جێبەجێكردنی پڕۆژەی خزمەتگوزاری لە گوندی كۆری.
ئەوەش خراوەتە ڕوو، ئەو گوژمەیە لەسەر ڕێژەی 15%ی داهاتی سەرۆكایەتیی شارەوانیی هەولێرە بە مەبەستی جێبەجێكردنی پڕۆژەی خزمەتگوزاریی كردنەوەی شەقامە سەرەكییەكانی گوندی كۆری لە زۆنی B لە سنووری بەڕێوەبەرایەتیی شارەوانیی دووی شاری هەولێر.
لە ڕاگەیاندراوەكەدا ڕوونیش كراوەتەوە، ئەو گوژمەیە بەپێی ڕێنوێنییەكانی دارایی تایبەت بە داهاتەكان فەرمانی وەزاری بۆ خەرجكردنی دەرچووە و پرۆژەكە كاریگەرییەكی زۆر باشی لەسەر بەرزكردنەوەی ئاستی خزمەتگوزارییەكانی ئەو شوێنە دەبێت بە تایبەتی لە ڕووی شەقامسازی و ئاسانكاریی هاتوچۆوە.