لۆید ئۆستن، وەزیری بەرگریی ئەمریکا، بە ئاژانسی هەواڵی ئەسۆشیەیتد پرێسی ڕایگەیاند، ویلایەتە یەکگرتووەکان بۆ ڕێگریکردن لە دووبارە دروستبوونەوەی گرووپی داعش وەک “هەڕەشەیەکی گەورە” دوای ڕووخانی حکومەتی بەشار ئەسەد دەبێت هێزە سەربازییەکانی خۆی لە سووریا بپارێزێت.
ئۆستن، ڕۆژی چوارشەممە ٨ی کانوونی دوهەم، گوتی ئامادەبوونی سەربازیی ئەمریکا لە سووریا بەتایبەتی بۆ دابینکردنی ئاسایشی بەندیخانەکانی سووریا پێویستە کە دەیان هەزار کەس لە ئەندامانی پێشووی داعش و خێزانەکانیان لەخۆ دەگرێت.
بەپێی خەمڵاندنان، هەشت هەزار بۆ دە هەزار چەکداری داعش لەم کەمپانەدا هەن کە لانیکەم دوو هەزار کەسیان بە “زۆر مەترسیدار” دادەنرێن.
وەزیری بەرگریی ئەمریکا لە بنکەی ئاسمانیی “ڕامشتاین” لە ئەڵمانیا گوتی: ئەگەر سووریا بەجێ بهێڵرێت، هێزەکانی داعش دەگەڕێنەوە سەر چالاکییە سەرەکییەکانی خۆیان.
ئەمریکا نزیکەی ٢ هەزار سەربازی لە سووریا هەیە. ئەم هێزانە لە ساڵی ٢٠١٥ و دوای ئامادەبوونی داعش لە ناوچە فراوانەکانی سووریا بۆ ئەم وڵاتە نێردران.
لێدوانی، لۆید ئۆستن لە کاتێکدایە، هێرشەکانی فەرماندەیی ناوەندیی ویلایەتە یەکگرتووەکان (سێنتکۆم) لە دژی داعش لە سووریا بۆ ڕێگریکردن لە بەهێزبوونەوەی دووبارەیان بەردەوامە.
