ڤەكرنا جاددەیەكێ ل ناڤا پاریس بناڤێ ” جاددەیا پێشمەرگە ” ب بەشداریا جەنابێ سەرۆك بارزانی گرنگەیاكا تایبەت هەیە نیشانەیا دوستایەتیا مێژوویە دناڤبەرا كوردستانێ و وەلاتێ فرەنسا دا و دەستكەفتەكا گرنگە بۆ كورد و كوردستانێ كو ب ڤی شێوەی ل ئەورۆپا كو ب دایكا دیموكراسیێ دهێتە زانین ڕێز ل خەبات و ماندیبوونا پێشمەرگەی بهێتەگرتن، ئەڤە ڤێ چەندێ دگەهینیت كو پێشمەرگە نەك تنێ پارێزەرێن كوردستانێ نە بەلكو پێشمەرگە پارێزەرێن ئاشتیێ و پێكڤەژیانێ نە ل هەمی جیهانێ، ڕولێ بەرچاڤێ پێشمەرگەی د شەرێن دژی تیرۆرستێن داعش بۆ جیهانێ هەمیێ سەلماند كو ئەڤ قەهرەمانیا پێشمەرگەی بەرامبەری ڤێ ڕێكخراوا تیرۆرستی هەژی ڕێزگرتن و دانپێدانانەكا مێژووییە
جەنابێ سەرۆك بارزانی ژی ئاماژە بڤێ یەكێ كر ” كو پەیوەندیەكا مێژووی هەیە دناڤبەرا كوردستانێ و گەلێ فڕەنسا و ئەڤە ڕێزلێنانەكا مەزنە و هەتا ئێك كورد مایە سوپاسگوزارێ گەلێ فڕەنسایە” ب درێژاهیا مێژوویێ و ل سالێن شێستێ هەتا ئەڤڕۆ پەیوەندیەكا گرنگ و تایبەت هەیە دناڤبەرا وەلاتێ فڕەنسا و گەلێ كوردستانێ د زوڕ وەختێن دژوار فڕەنسا پشتگیری ل گەلێ كوردستانێ كریە و كوردستان پاراستیە، بونمونە فڕەنسا بوو پێشنیارا بڕیارا 986 یا ئەنجومەنێ ئاسایشا نێڤدەولەتی كری بۆ دانانا ناوچەیا دژەفرینێ ل كوردستانێ، هەروەها ل دەمێ ئاوارەییێ ل ساڵا 1991 دانیال میترانا فڕەنسی بۆ هاتە كوردستانێ و دەنگێ كوردان گەهاندیە جیهانێ، چەند جارەكا سەرۆكێ فڕەنسا هاتبیتە عێراقێ سەرەدانا هەرێما كوردستانێ ژی كریە و بێ كوردستان نەڤەگەریایە هەر وەك ل ساڵا 2017 ل دەمێ شەڕێ دژی داعش فرانسوا ئولاند سەرۆكێ فڕەنسا هاتە كوردستانێ و دگەل جەنابێ سەرۆك بارزانی سەردانا میحوەرێن پێشمەرگەی كر و ئەڤ یێك ڕاگەهاند كو پالپشتێن هەرێما كوردستانێ و پێشمەرگەینە ، چونكی پێشمەرگە پێش هەمی جیهانێ شەڕێ ژناڤبرنا تیرۆرێ دكەن، دوماهیك جار ژی ل پشتی ڕیفراندومێ سەرۆكێ فرەنسا سەردانا هەرێما كوردستانێ كر و ئێكەم وەلات بوو پێشوازی ل هەرێما كوردستانێ كری.
دڤی بارودوخێ نەخوش و دژاوار كوردستان و جهیان پێدا دەرباس دبیت ڤەكرنا جادەیەكێ ل ناڤا وەلاتەكێ تەمام دیموكراسی وەك فرەنسا نیشانێ گەهاندنا لوبییەكا بهێزە بو كوردستانێ و پشتیوانیەكا گرنگە بو پێشمەرگا و پاراستنا ناڤێ پیرۆزێ پێشمەرگەی، ئەڤ ڕێزا ئەڤڕۆ ل پێشمەرگەی دهێتەگرتن ل ناڤا گەلێن جیهانێدا پێشمەرگەی وەك ڕەمزا خوڕاگریێ و بەرگریێ ل ئاسایش و ئاشتیا جیهانێ ددەتە نیاسین .
ئەڤ كارێ دیبلوماسی و كلتوری دناڤا وەلاتێ فرەنسا و كوردستانێدا شاهەدیا هندێ ددەت كو دەنگێ كوردستانێ ل گەهاندنا بدەستخستنا مافێن كوردان ل ناڤ دەولەتێن جیهانێدا بهێزتر دبیت و گرەنتیەكە كو د داهاتیدا كورد ب سەركردایەتیا جەنابێ سەرۆك بارزانی ڕولەكێ بەڕچاڤ دێ هەبیت د گوڕانكاریاندا ل ڕوژ هەلاتا ناڤەڕاستدا.
جیگر رەشید هەركی