حەمەی حەمەسەعید، وەزیری ڕۆشنبیری و لاوانی حکومەتی هەرێمی کوردستان، دوێنێ دووشەممە، 15ـی ئەیلوولی 2025، لە دیوانی وەزارەت پێشوازی لە هونەرمەند هۆزان جانێ کرد.
لە کۆبوونەوەیەکدا، وەزیر پێزانینی خۆی بۆ خزمەتەکانی هۆزان جانێ لە بواری هونەر و میوزیکی کوردیدا دەربڕی و جەختی لە ڕۆڵی گرنگی هونەرمەندان کردەوە لە پاراستن و زیندووهێشتنەوەی زمانی کوردی.
حەمەی حەمەسەعید ڕایگەیاند: “دەرگای وەزارەتی ڕۆشنبیری و لاوان بە ڕووی سەرجەم هونەرمەندانی کوردستاندا کراوەیە و پشتیوانی پڕۆژە هونەرییەکانیان دەکەین.”
هۆزان جانێ سوپاسی ئەو پێشوازییەی کرد و پێزانینی خۆی نیشاندا بۆ ئەو پشتیوانییەی لە هەرێمی کوردستانەوە پێشکەش بە هونەر و هونەرمەندانی کورد لە تاراوگە دەکرێت.