دەم پارتی لە ڕاگەیاندنی بەیاننامەی کۆتایی کۆنفرانسی نێودەوڵەتی ئاشتی و کۆمەڵگەی دیموکراسی کە لە ٦ و ٧ی کانوونی یەکەمی ٢٠٢٥دا لە ئیستانبوڵ ڕێکی خست، گوتوویەتی کە ئازادکردنی سەرجەم زیندانیانی سیاسی، بە تایبەتی عەبدوڵڵا ئۆجەلان و سەڵاحەدین دەمیرتاش، پێویستییەکی پڕۆسەی ئاشتییە.
لە بەیاننامەکەدا هاتووە کە ئەو ڕێکخستنە یاساییانەی مافی هیوادان بە ئۆجەلان دەدەن و ڕێگە بۆ ئازادکردنی دەکەنەوە، وەک مەرجێک بۆ ئاشتی دەبینرێن. لەگەڵ ئەوەشدا، دەم پارتی جەختی لەوە کردووەتەوە کە زۆر گرنگە ئەم پڕۆسەیە بە شێوەیەکی گشتگیرتر و بنیاتنەرتر بەڕێوەبچێت. کۆنفرانسەکە ئاماژەی بەوە کرد کە پڕۆسەی ئاشتی دەرفەتێکی مێژووییە بۆ وەستانی یەکجارەکی ململانێکان، و بڕیاری هەڵوەشاندنەوەی پەکەکە بە هەنگاوێکی بوێرانە و مێژوویی بەرەو ئاشتی دادەنرێت. ئەم هەنگاوە دەرفەتێکی گەورە دەڕەخسێنێت بۆ کۆتاییهێنان بەو ململانێ و ناسەقامگیرییە لەمێژینەی دەڤەرەکە.
لە چوارچێوەی ئەم دیدگایەدا، تورکیا پێویستی بە ڕێککەوتنێکی کۆمەڵایەتیی نوێ و دیموکراسی هەیە کە هەموو گەلان و بیروباوەڕ و ناسنامەکان لەسەر بنەمای هاووڵاتییەکی یەکسان لەخۆ بگرێت. هەروەها، بۆ ئایندەیەکی ئاشتی و گۆڕانکاریی دیموکراسی لە تورکیا، ئازادکردنی سەرجەم زیندانیانی سیاسی، بە تایبەتی عەبدوڵڵا ئۆجەلان و ئەو سیاسەتمەدارانەی بەهۆی دۆسیەی کۆبانییەوە دەستگیر کراون، بە پێویستییەکی مێژوویی و یاسایی دادەنرێت.