عەلی خامنەیی، ڕێبەری باڵای کۆماری ئیسلامی ئێران، لە پەیامێکدا لە هەژماری تایبەتی خۆی لە تۆڕی کۆمەڵایەتی “ئێکس”، کاردانەوەی بەرامبەر گردبوونەوە و ناڕەزایەتییەکانی ئەم دواییەی بازاڕ و کاسبکارانی ئێران نیشاندا و جەختی لە “وەفاداریی بازاڕ بۆ کۆماری ئیسلامی” کردەوە.
خامنەیی لە پەیامەکەیدا نووسیویەتی: “چینی بازاڕ یەکێکە لە وەفادارترین چینەکانی وڵات بە کۆماری ئیسلامی و شۆڕش. ئێمە بازاڕ بە باشی دەناسین، بۆیە ناتوانرێت بە ناوی بازاڕ و بازارییەوە دژایەتی کۆماری ئیسلامی بکرێت.”
ڕێبەری ئێران ئاماژەی بە ڕەوایی داواکاریی بازارییان کرد و وتی: “بەڵێ، ئەم گردبوونەوانە زیاتر لەلایەن بازارییەکانەوە بوون، بەڵام قسەکانیان قسەی ڕاست و دروست بوو.”
سەبارەت بە هۆکاری ناڕەزایەتییەکان، خامنەیی ڕایگەیاند: “کاتێک کاسبکار و بازاری سەیری دۆخی دراوی وڵات، دابەزینی بەهای پارەی نیشتمانی و نەبوونی سەقامگیری نرخەکان دەکات، کە دەبێتە هۆی ئەوەی ژینگەی کار و کاسبی تێکبچێت، دەڵێت ناتوانم کار بکەم؛ ئەمە قسەیەکی ڕاستە و بەرپرسانی وڵاتیش ئەم ڕاستییە قبوڵ دەکەن.”
ئەم پەیامەی خامنەیی لە کاتێکدایە کە لە ماوەی ڕابردوودا بەهۆی دابەزینی بەهای تمەن و بەرزبوونەوەی نرخەکان، لە چەندین شاری ئێران بازارییان مانیان گرت و گردبوونەوەی ناڕەزایەتییان ئەنجامدا