نرخەکانی نەوتی جیهانی لە ڕۆژی هەینی دا ئارام بوون، بەڵام بە شێوەیەکی گشتی بەردەوامن لە تۆمارکردنی گەورەترین دابەزینی هەفتانە لە سەرەتای مانگی نیسانەوە، دوای ئەو هەواڵانەی باس لە گەیشتنی ئەمریکا و ئێران دەکەن بۆ ڕێککەوتنێکی ئەگەری بۆ درێژکردنەوەی ئاگربەست.
نرخی نەوتی برێنت بۆ تەسلیمکردنی مانگی تەممووز بە قەدری ٣٤ سنت، واتە ٠.٣٪، دابەزی و گەیشتە ٩٤.٠٥ دۆلار بۆ هەر بەرمیلێک تا کاتژمێر ٠٨:١٠ی بەیانی بە کاتی گرینویچ. هەروەها، نەوتی خامی ئەمریکا (WTI) لە ٨٨.٨٩ دۆلاردا جێگیر بوو، دوای ئەوەی هەردووکیان پێشتر زیاتر لە ١٪ دابەزین تۆمار کردبوو.
لە ماوەی ئەم هەفتەیەدا، برێنت نزیکەی ٩٪ دابەزیوە، کە گەورەترین کەوتنی هەفتانەیەتی لە هەفتەی ٦ی نیسانەوە. هەروەها، WTI نزیکەی ٨٪ کەوتووە، کە گەورەترین زیانی هەفتانەیەتی لە هەفتەی ١٣ی نیسانەوە.
جیۆڤانی ستاونۆڤۆ، شیکەرەوەی UBS، وتی:”هەرچەندە هێشتا گواستنەوەی نەوت لە ڕێگای کەنداوەی هۆرمز سنووردارە و کۆگاکانی نەوتیش بەردەوامن لە کەمبوونەوە، بەڵام سەرنجی بازاڕ زیاتر ئاراستەی ئەگەری گەیشتن بە ڕێککەوتنێک لەنێوان ئەمریکا و ئێرانە.”
بەپێی سەرچاوەکان بۆ ڕۆیتەرز، ئەمریکا و ئێران لە ڕۆژی پێنجشەممەدا گەیشتوونەتە ڕێککەوتنێک بۆ درێژکردنەوەی ئاگربەست و هەڵگرتنی سنووردارییەکانی گواستنەوەی کەشتی لە ڕێگای کەنداوەی هۆرمز. بەڵام، سەرۆکی ئەمریکا دونالد ترەمپ هێشتا پەسەندی نەکردووە و میدیای فەرمی ئێرانیش ڕایگەیاندووە کە ڕێککەوتنەکە هێشتا تەواو نەبووە.