تۆم کرووز، ئەستێرەی جیهانی سینەما، گەڕانەوەی زنجیرە فیلمی بەناوبانگی تۆپ گەنی بۆ بەشی سێیەم پشتڕاست کردەوە.
کۆمپانیای پاراماونت پیکچەرز لە کۆنفرانسی سینەماکۆن لە لاس ڤێگاس ڕایگەیاند، پڕۆژەکە لە قۆناغی گەشەپێدانی سەرەتاییدایە.
جۆش گرینشتاین، سەرۆکی هاوبەشی ستۆدیۆکە ئاماژەی بەوە کرد، ئێستا کار لەسەر نووسینی سیناریۆکە دەکرێت.
بڕیارە ئێرین کروگەر سیناریۆی ئەم بەشە بنووسێت و جێری برۆکهایمەریش وەک بەرهەمهێنەر بەردەوام بێت.
تۆم کرووز لە پەیامێکی ڤیدیۆییدا بە گاڵتەجاڕییەوە گوتی، داهاتوو لەم شوێنەوە زۆر نایاب دەردەکەوێت.
هەرچەندە هێشتا ناوی دەرهێنەر و کاتی نمایشکردنی فیلمەکە دیاری نەکراوە، بەڵام گڵێن پاوڵ ئاشکرای کرد، وێنەگرتن ڕەنگە زۆر زووتر لەوەی چاوەڕوان دەکرێت دەستپێبکات.
ئەم زنجیرە فیلمە تەنیا لە ڕووی داهاتەوە سەرکەوتوو نەبووە، بەڵکو پێگەیەکی بەهێزی لە مێژووی فیلمی ئەکشندا هەیە.