زانایانی بەریتانیا سەرکەوتنێکی گەورەیان لە بواری وزەی نوێبووەوەدا تۆمارکرد، دوای ئەوەی توانیویانە لە ڕێگەی گۆڕینی خوێ و شێی دەوروبەرەوە، وزەی کارەبا بە شێوەیەکی بەردەوام و ژینگەدۆست بەرهەم بهێنن. ئەم داهێنانە دەبێتە هۆی چارەسەرکردنی زۆربەی کێشەکانی دابینکردنی وزە بۆ ئامێرە بچووکەکان.
بەپێی ڕاپۆرتێکی ماڵپەڕی زانستی “Interesting Engineering”، تیمی توێژەران لە چەند زانکۆیەکی بەریتانیا و جیهان (وەک زانکۆی شاژنە ماری، وارویک، ئیمپریال کۆلێژی لەندەن، مێرکاتۆرۆم و پەیمانگای یر) توانیویانە مۆلیدەیەکی کارەبایی پەرەپێبدەن کە بۆ بەرهەمهێنانی وزە تەنها پشت بە خوێی چێشت، جەلاتین و کاربۆنی چالاککراو دەبەستێت.
توێژەران لە بڵاوکراوەیەکدا ئاماژەیان بەوە کردووە کە لە ئێستادا ئامێرە هەستیارەکانی سەر پێست (وەک حەب و لەزگەی پزیشکی)، ئامێرە کشتوکاڵییەکان و پێوەرە ژینگەییەکان پێویستییەکی زۆریان بە سەرچاوەیەکی وزە هەیە کە لە ژینگەی تەڕدا کاربکات بەبێ ئەوەی پێویستی بە گۆڕینی بەردەوامی پاتری هەبێت.
پێشتر مۆلیدەکانی هاوشێوە پشتیان بە پلاستیک و پێکهاتەی ئاڵۆز دەبەست کە زیانیان بە ژینگە دەگەیاند، بەڵام ئەم داهێنانە نوێیە تەواو سروشتی و بێ زیانە.
تایبەتمەندییە سەرنجڕاکێشەکانی ئەم مۆلیدە نوێیە خۆی لەم خاڵانەدا دەبینێتەوە:
تەمەنی درێژ: تەنها یەک یەکەی بچووک لەم مۆلیدەیە دەتوانێت بۆ ماوەی زیاتر لە 30 ڕۆژ بە بەردەوامی تەزووی کارەبا بە هێزی 1 ڤۆڵت بەرهەم بهێنێت، ئەویش تەنها لە ڕێگەی مژینی شێی دەوروبەری.
توانای بەرزکردنەوە: بە بەستنەوەی چەند یەکەیەک بەدوای یەکدا، زانایان توانیویانە هێزی کارەباکە بگەیەننە 90 ڤۆڵت، کە ئەمەش بەس بووە بۆ داگیرساندنی 40 گلۆپی جۆری (LED) لە یەک کاتدا.
وەرچەرخان لە پیشەسازی ئەلیکترۆنیدا
ئەم داهێنانە نوێیە شێی هەوا – کە پێشتر وەک بەربەست و دوژمنی ئامێرە ئەلیکترۆنییەکان سەیر دەکرا – دەگۆڕێت بۆ سەرچاوەیەکی گرنگی وزە، ئەمەش لە ڕێگەی ئاسانکاریی جووڵەی ئایۆنەکان لەناو ماددەکەدا.
دکتۆر دیمیتریوس پاپاجۆرگیو، سەرپەرشتیاری سەرەکی توێژینەوەکە ڕایگەیاند،
”ئامانجی ئێمە پێداچوونەوە بوو بە شێوازی دیزاینکردن و دروستکردنی ماددە ئەلیکترۆنییەکان. ئەم توێژینەوەیە دەیسەلمێنێت کە دەکرێت ئامێری بەرهەمهێنانی وزەی زۆر بەهێز لە ماددەی کەم تێچوو و ژینگەدۆست دروست بکرێت.”
ئەم هەنگاوە وەک شۆڕشێک سەیر دەکرێت بۆ کەمکردنەوەی پاشماوە ئەلیکترۆنییە زیانبەخشەکانی جیهان و دابینکردنی وزەی پاک و هەرزان.