شێوەکاری کورد، ئاریان لەتیف، بەشداریی خۆی لە پڕۆژەیەکی هونەری و پەروەردەییدا لە شاری لەندەنی پایتەختی بەریتانیا ڕاگەیاند.
پڕۆژەکە لە ژێر ناونیشانی “پەڕتووکی ڕەنگکردن” و لەلایەن ڕێکخراوی گوڵانەوە جێبەجێ کراوە، ئامانجی سەرەکیی ناساندنی کولتوور، هونەر و جوگرافیای کوردستانە بە منداڵانی کورد لە سەرانسەری جیهاندا.
ئەم پڕۆژەیە کە گەیشتووەتە بەرگی سێیەمی خۆی، تایبەت کراوە بە چیرۆک و ئەفسانە فۆلکلۆرییەکانی کوردی، تێیدا هونەرمەندانی کورد بە دەست و پەنجە ڕەنگینەکانیان تابلۆکانیان نەخشاندووە، تاوەکو منداڵان لە ڕێگەی ڕەنگکردنی تابلۆکان و خوێندنەوەی زانیارییەکان بە هەردوو زمانی کوردی و ئینگلیزی، بە شێوازێکی زیندوو و سەرنجڕاکێش ئاشنای مێژوو و ناسنامەی نەتەوەیی خۆیان بن.
ئاریان لەتیف لە بارەی ئەم پڕۆژەیەوە لە هەژماری تایبەتی خۆی لە فەیسبووک دەڵێت: “منداڵان لە ڕێگەی ئەم کارەوە نەک تەنیا هونەر دەبینن، بەڵکو بە شێوازێکی هاوچەرخ پەیوەندییان لەگەڵ ڕەگ و ڕیشەی خۆیان بەهێز دەبێت.”
پڕۆژەکە لەلایەن هونەرمەندان مەریوان جەلال و دڵکەش موراد ڕێکخراوە و ڕیچارد وایڵدینگ، ئەرکی بەرهەمهێنان و مۆنتاژی کارەکەی لە ئەستۆ گرتووە.