لە رێوڕەسمێکدا لە هەولێری پایتەخت رێكخرابوو، ئومێد خۆشناو، پارێزگاری هەولێر خەڵاتی زێڕینی بەخشییە شانۆكار و دەرهێنەری سدیق حوسێن.
لقی هەولێری سەندیکای هونەرمەندانی کوردستان بە هەماهەنگی و پاڵپشتی پارێزگای هەولێر رێوڕسمەکەی رێكخستبوو، تێیدا شاخەوان مستەفا، بەڕێوەبەری سینەما و شانۆی هەولێر و نوێنەرایەتی بەڕێوەبەرایەتی گشتی رۆشنبیری و هونەری هەولێر چەپكەگوڵی رێزلێنانی پێشكەش بە سدیق حوسێ) كرد.
هەر لە رێوڕەسمەکەدا كە ژمارەیەكی بەرچاو لە بەرپرسانی حزبی و حكومی و هونەرمەندان ئامادەبوون، لەلایەن بەشێكی ئەو ئامادەبووانەش چەپكەگوڵ پێشكەشى هونەرمەند كرا.
رێزلێنان لەم هونەرمەندە، رێزگرتنە لە مێژووی پڕ لە دەستکەوت لە بواری شانۆ و درامای كوردی و هەوڵی بەردەوامی بۆ پێگەیاندنی نەوەی نوێ بۆ شانۆ، كە خۆی دامەزرێنەر و داهێنەری قوتابخانەی (شانۆی سات)ـە و بۆ ئەم مەبەستەش خاوەنی چەندین كار و بەرهەمی شانۆییە.