لە چوارچێوەی هەماهەنگی وەزارەتی رۆشنبیری و لاوانی حکومەتی هەرێمی کوردستان و کونسوڵخانەی کۆماری چین لە هەرێمی کوردستان، مەریوان نەقشبەندی، فەرمانبەری دیوانی وەزارەت بەشداری لە خولێکی راهێنان و ئاڵوگۆڕی کولتووریی لە چین کرد.
خولەکە 23 رۆژی خایاند، تێیدا شارەزایان و توێژەرانی چین چەندین سیمیناریان سەبارەت بە مێژوو و کولتوور و لایەنە جیاجیاکانی فەرهەنگ و هونەری وڵاتەکەیان بۆ بەشداربووان خستەڕوو.
وێڕای سیمینارەکان، گەشتی تایبەت بۆ مۆزەخانە و ناوەندە کولتووری و هونەری و رۆشنبیرییەکان و شوێنەوارە دێرینەکانی چەند هەرێمێکی چین رێکخرا.
لەو چوارچێوەیەدا، نوێنەری وەزارەتی رۆشنبیری و لاوان وێڕای ناساندنی هونەر و کولتووری هەرێمی کوردستان، چەندین دیاری سیمبوڵیی تایبەت بە هەرێمی کوردستانی پێشکەش بە لایەن و کەسایەتییە بەشداربووەکان کرد.
بە هەماهەنگی وەزارەتی رۆشنبیری و لاوان، کونسوڵخانەی چین، بۆ هەر خولێکی کولتووری و فەرهەنگی، بانگهێشتی ژمارەیەک فەرمانبەری وەزارەت دەکات بۆ ئەوەی سەردانی کۆماری چین بکەن.
پێشتریش لە مانگی ئەیلوول و تشرینی یەکەمی ساڵی رابردوو، شاندێکی وەزارەت بەشداریی لە خولێکی دوو هەفتەیی لە کۆماری چین کرد.