خانمە ئەکتەری جیهانی سکارلێت جۆهانسن، وەک پاڵەوانی فیلمی نوێی زنجیرە فیلمی بەناوبانگی (Exorcist) دەستنیشانکرا.
مایک فلانەگان پێشتر دەرهێنانی بۆ فیلمە دیارەکانی (The Haunting of Hill House) و (Doctor Sleep) کردووە، ئەرکی نووسین و دەرهێنانی ئەم بەشە نوێیەی زنجیرەکە لە ئەستۆ دەگرێت.
فلانەگان لە لێدوانێکدا بۆ ماڵپەڕی (Variety) رایگەیاند: “سکارلێت جۆهانسن ئەکتەرێکی نایابە و هەمیشە ڕۆڵگێڕانە سەرنجڕاکێشەکانی، لایەنێکی واقیعی دەبەخشنە کارەکان. زۆر دڵخۆشم بە پەیوەندیکردنی بە فیلمی Exorcistـەوە”.
تاوەکو ئێستا وردەکاری زیاتر دەربارەی چیرۆکی فیلمەکە و ئەکتەرەکانی دیکە ئاشکرا نەکراوە، بەڵام بڕیارە لە مانگی ئاداری 2026 نمایش بکرێت.
فیلمەکە چیرۆکێکی سەربەخۆ دەبێت و پەیوەندی بە بەشی دووەمی فیلمی (The Exorcist: Believer)ـەوە نییە کە ساڵی 2023 نمایشکرا و دەیڤد گۆردن گرین دەرهێنانی بۆ کردبوو. جێی باسە گرین پلانی دانابوو سێ بەش بەرهەم بهێنێت، بەڵام دوای ئەوەی فیلمەکەی پێشووی نەیتوانی سەرکەوتن بەدەستبهێنێت، لە پڕۆژەکە کشایەوە.