ئەستێرەی هۆڵیوود، جۆرج کلۆنی، بڕیاریدا لەگەڵ هاوسەرەکەی ئەمەل عیلمەدین و منداڵەکانی، دوور لە ژاوەژاوی ناوبانگ و فەرشی سوور، ژیانێکی ئارام لە هەرێمی “ڤار” لە باشووری فەڕەنسا هەڵبژێرێت.
ڕۆژنامەی “لۆ پاریسیان”ی فەڕەنسی لە ڕاپۆرتێکدا تیشکی خستۆتە سەر ژیانی ئەم خێزانە و ئاشکرای کردووە کە کلۆنی بووەتە دراوسێیەکی نائاسایی لە شارۆچکەی “برینجۆل”. ئەم ئەکتەرە ناسراوە پاش وەرگرتنی ڕەگەزنامەی فەڕەنسی، لە ڤێلایەکی زۆر شکۆمەند بە ناوی “کانادێل” نیشتەجێ بووە کە بە تەواوی لە چاوی خەڵکی شاراوەتەوە.
دراوسێکانی کلۆنی باس لەوە دەکەن کە جموجۆڵێکی زۆر لەناو ڤێلاکەدا هەیە. “بریجیت” کە یەکێکە لە دراوسێ نزیکەکانی، دەڵێت ڕۆژانە بارهەڵگر و وەستا و پیشەکارێکی زۆر دەچنە ناو موڵکەکەی کلۆنی بۆ ئەنجامدانی چاکسازی و گۆڕانکاری گەورە.
کلۆنی بۆ ئەم کارانە پەنای بۆ هیچ کام لە دانیشتووانی ناوچەکە نەبردووە و هەموو گرێبەستەکانی پێشوەختە لەگەڵ کۆمپانیا دەرەکییەکان واژۆ کردووە. ئەم ژیانە نوێیەی کلۆنی نیشانەی ئەوەیە کە دەیەوێت بە تەواوی لە چاوی میدیاکان دوور بکەوێتەوە و ژینگەیەکی پارێزراو بۆ پەروەردەکردنی منداڵەکانی دابین بکات، هەرچەندە بوونی ئەستێرەیەکی لەو شێوەیە لە گوندێکی بێدەنگدا هەمیشە دەبێتە جێی سەرنجی میدیاکان.