کیم کارداشیان، ئەستێرەی تەلەفزیۆنی واقیعی و لویس هامیلتۆن، پاڵەوانی پێشبڕکێکانی فۆرمۆلا وەن، بە دەرکەوتنیان لە یاری کۆتایی “سۆپەر بۆڵ 2026” کۆتایییان بە دەنگۆکان هێنا و پەیوەندییە سۆزدارییەکەیان ئاشکرا کرد.
ئەم دوو ناودارە لە یاریگای “لیڤایز” لە کالیفۆرنیا پێکەوە بینران، کە ئەمەش بە یەکەم دەرکەوتنی فەرمی و گشتییان پێکەوە دادەنرێت.
کیمی تەمەن 45 ساڵ بە ستایلێکی نوێ و هامیلتۆنی تەمەن 41 ساڵ بە جلوبەرگێکی وەرزشییەوە سەرنجی میدیاکانیان بۆ خۆیان ڕاکێشا.
پێش ئەم دەرکەوتنە، دەنگۆی ئەوە هەبوو کە پێکەوە پشوویەکی سۆزدارییان لە ئەوروپا و شارەکانی لەندەن و پاریس بەسەر بردووە.
سەرچاوە نزیکەکان باس لەوە دەکەن کە سەرەڕای سەرقاڵیی زۆری هەردوایان، بەڵام هەوڵ دەدەن کاتی زیاتر بۆ یەکتر تەرخان بکەن.
هەرچەندە تا ئێستا هیچ لێدوانێکی فەرمییان لەسەر جۆری پەیوەندییەکەیان نەداوە، بەڵام دانیشتنیان تەنیشت یەکتر لە ڕووداوێکی گەورەی وەک سۆپەر بۆڵ، وەک ڕاگەیاندنێکی ناڕاستەوخۆ دەبینرێت.