کاری هونەری “Comedian” کە مۆزەیەکی پێوە لکێنراوە و هی هونەرمەندی ئیتاڵی ماوریتسیۆ کاتێلانە، جارێکی دیکە بووەوە بە باسی میدیاکان. ئەمە دوای ئەوەی سەنتەری پۆمپیدۆ-مێتز ڕایگەیاند، مۆزە نمایشکراوەکە لە کاتی پشووی کۆتایی هەفتەدا دیار نەماوە.
ئەمە دووەم جارە ڕووداوی لەو شێوەیە لەو مۆزەخانەیە ڕوو بدات. ساڵی ڕابردوو سەردانیکەرێک مۆزەکەی لێ کردەوە و لەبەردەم جەماوەر خواردی. کاتێلان بە گاڵتەجاڕییەوە لەبارەی ئەو ڕووداوە گوتی، ئەو پیاوە جیاوازی نێوان میوە و کاری هونەری نەکردووە.
جاستن سەن، ئەو ملیاردێرەی کە کارەکەی بە 6.2 ملیۆن دۆلار کڕیوە، خۆیشی مۆزەکەی بە ئاشکرا خوارد.
مۆزەخانەکە ئاماژەی بۆ ئەوە کرد، بەپێی پڕۆتۆکۆڵی هونەرمەندەکە، مۆزەکە دەبێت چەند ڕۆژ جارێک بگۆڕدرێت بۆ ئەوەی بە تازەیی بمێنێتەوە، بۆیە هیچ زیانێکی هەمیشەیی بەر کارە هونەرییەکە نەکەوتووە.
بایەخی ئەم کارە لە بڕوانامەی ڕەسەنایەتییەکەیدایە نەک لە میوەکە خۆی، بەڵکو ئەمجارە مۆزەخانەکە سکاڵای فەرمی تۆمار کردووە، چونکە بێڕێزی بەرامبەر کارە هونەرییەکان کراوە.
ئێستا ناسنامەی ئەو کەسەی مۆزەکەی بردبوو نادیارە و مۆزەخانەکەش ئامادە نییە ڕایبگەیەنێت ئایا ڕێکاری ئەمنی توندتر دەگرێتە بەر یان نا.