پارێزگاری بانكی ناوەندیی عێراق ئاشكرای دەكات، رێكارەكانی پێدانی دۆلار بە گەشتیاران گۆڕانكاریی تێدا كراوە و دەشڵێت: “لە فڕۆكەخانەكانی هەولێر و سلێمانییش دۆلار بە نرخی فەرمی دەدرێتە گەشتیاران.”
عەلی عەلاق، پارێزگاری بانكی ناوەندیی عێراق ڕایگەیاند: «بۆ پێدانی دۆلار بە نرخی فەرمی بە گەشتیاران، گۆڕانكاریی زۆر كراوە، تا دوای مۆری ڕۆیشتن لە فڕۆكەخانە، دۆلار نادرێت بە گەشتیار.”
ئاماژەی بەوەش دا: “پرۆسەكە چەند ڕۆژێك لەمەوبەر دەستی پێكردووە، بەڵام بە گشتی زۆر بەئاسانی بەڕێوە دەچێت، لە فڕۆكەخانەكاندا تیم هەیە بۆ چاودێریكردنی پرۆسەكە و بەدواداچوونی راستی و دروستیی ئەو بڕە دۆلارەی دەدرێت، ئەمەش بۆ گەیشتن بە ئامانجەكانمانە، كە بریتیبە لە گەیشتن بە ڕێبوارە ڕاستەقینەكە.”
عەلی عەلاق روونیشی كردەوە، رێكارەكان دەستیان پێكردووە و لە رێگەی فڕۆكەخانەكانی هەرێمی كوردستانیش دۆلار دەدرێتە گەشتیاران، گوتیشی: “وەك چۆن لە بەغدا دەستمان پێكرد، پاشان بەسرە، ئینجا نەجەف ئێستاش ڕێكارەكان دەستیان پێكردووە، بۆ ئەوەی دۆلار بە نرخی فەرمی لە فڕۆكەخانەكانی هەولێر و سلێمانی و كەركووك بدرێـت بە گەشتیاران.”
پارێزگاری بانكی ناوەندیی عێراق دەشڵێت: “لە ئۆپەراسیۆنەكانی پێشوودا لە پێدانی دۆلار بە گەشتیاران، بەهۆی چەندین كێشەوە ڕێگرییان لێ كرا و سەركەوتوو نەبوو، خەڵكێكی زۆر هەوڵیان دا بچن لە ڕێگەی جۆراوجۆرەوە بەناوی گەشتیاری دۆلار وەربگرن، ئەمەش كاریگەریی نەرێنی لەسەر دۆلار هەبوو، هەروەها بەكارهێنانی پاسپۆرتی كەسانی دیكەش، بۆیە رێكارەكان گۆڕانكارییان تێدا كراوە و توند كراون.”
شوان بەرزنجی