فەرماندەی گشتی هێزە چەکدارەکانی عێراق داوا لە مەشقپێکراوانی عێراق لە پاکستان دەکات بگەڕێنەوە.
محەممەد شیاع سوودانی، سەرۆک وەزیران فەرماندەی گشتی هێزە چەکدارەکان، داوایەکی ئاڕاستەی گرووپی ڕاهێنراوی عێراق لە پاکستان کرد بگەڕێنەوە.
ژمارەی ئەو عێراقییانەی لە پاکستان مەشق دەکەن، بریتین لە 500 ئەفسەر و پلەدار، سەر بە فەوجی دووەمی لیوای شەست و شەشن لە فیرقەی هێزی تایبەتی دووەم، کە ئێستا لە پاکستان لەژێر ڕێککەوتنێکی مەشقی پێشوەختەدا مەشقیان پێ دەکرێت.
ئەم بڕیارەی سەرۆک وەزیرانی عێراق، بەهۆی شەڕی نێوان هیندستان و پاکستانە، بۆ ئەوەی دڵنیابن لە سەلامەتی ئەو عێراقییانە، وەزارەتی بەرگری عێراقیش ڕێوشوێنی پێویستی بۆ گەڕانەوەیان گرتووەتە بەر.