لە كاتێكدا بارگرژییە سیاسییەكان و فشارە نێودەوڵەتییەكان لە زیادبوونێكی بەردەوامدان، دەركردنی یاسایەك كە بەهۆیەوە دەستەی حەشدی شەعبی دەگەیەنێتە ئاستی وەزارەتی بەرگریی عێراق، مەترسیی گەورە لەسەر عێراق دروست دەكات و ئەو خەونەی كە دوای نەمانی رژێمی بەعس بە عێراقەوە دەبینرا تاوەكوو ببێتە دەوڵەتێكی دیموكراسی، تا هەتایە دەزڕێت و نامێنێت.
وێڕای فشارەكان، پەرلەمانتارانی سەر بە میلیشیاكان دەیانەوێ ڕۆژی یەكشەممەی داهاتوو بە جلی حەشدی شەعبییەوە بچنە نێو پەرلەمان و بەزۆر پرۆژەیاساكە تێپەڕێنن. شارەزایانیش پێیانوایە كە ئەگەر ئەمە ڕوو بدات، عێراق بەم ئاراستانەدا دەڕوات:
د. ئینا رودۆڵف، خانمە توێژەر لە (King’s College London) پیوایە كە ئەگەر پرۆژەیاسای حەشدی شەعبی تێپەڕێندرێت، ئەوا حەشدی شەعبی بە فەرمی دەبێتە دامەزراوەیەكی سەربازیی دەوڵەتی عێراق، ئەمەش سەربەخۆیی بەو میلیشیا چەكدارانە دەدات كە خۆیان وابەستەی ئێرانن، هەرچەندە بانگەشەی ئەوە دەكرێت كە گوایە لەژێر فەرماندەیی فەرماندەی گشتیی هێزە چەكدارەكانی عێراقدان. دەشڵێت: ”بە كورتییەكەی، ئەم یاسایە بەرگێكی یاسایی بە بەری میلیشیاكاندا دەكات و تایبەتمەندییەكیان پێدەدات كە ئەمریكا نایەوێ ئەو تایبەتمەندییەیان هەبێت.“
دیڤن سچینكەر، توێژەری ناسراو لە پەیمانگای واشنتۆن پێیوایە كە دەركردنی ئەم پرۆژەیاسایە، دەبێتە هۆی بەرزكردنەوەی تواناكانی میلیشیاكانی سەر بە ئێران لەنێو عێراق، ئەمەش هەڕەشەیەكی راستەوخۆیە لەسەر بەرژەوەندییەكانی ویلایەتە یەكگرتووەكانی ئەمریكا، بۆیە ئەمریكا هۆشداریی راستەوخۆی داوە بەوەی كە بەرامبەر بە تێپەڕاندنی پرۆژەیاساكە بێدەنگ نامێنێتەوە.
ئەمە جگە لەوەی بەشێك لە سیاسەتمەدار و توێژەرانی ئەمریكا داوایان لە وڵاتەكەیان كردووە، رێوشوێنی توند دژی تێپەڕاندنی یاساكە بگرێتە بەر، لەنێوشیاندا سزادانی كۆمپانیا پەیوەندیدارەكان بە میلیشیاكانی حەشدی شەعبی و پێداچوونەوە بە پەیوەندییە ئەمنییەكانی نێوان بەغدا و واشنتۆن.