پەیامی مەکتەبی سیاسیی پارتی دیموکراتی کوردستان بەبۆنەی (٦٢)ەمین ساڵیادی دامەزراندنی یەکێتیی مامۆستایانی کوردستان.
بەڕێزان سکرتێر و ئەندامانی مەکتەبی سکرتاریەتی یەکێتیی مامۆستایانی کوردستان.
ئەمڕۆ ساڵیادی دامەزراندنی یەکێتیی مامۆستایانی کوردستانە، ئەو ڕێکخراوە پیشەییەی بە بڕیار و ڕێنمایی(بارزانیی نەمر) لە (١٥ی ئایاری ١٩٦٢) دامەزرا، دامەزراندنی ئەو ڕێکخراوە وەچەرخانێکی گرینگ و چارەنووسساز بوو لە بزووتنەوەی ڕزگاریخوازی گەلەکەمان و تێکۆشانی نەپساوەی ڕۆڵەکانی بە گشتی و مامۆستایان بە تایبەتی.
یەکێتیی مامۆستایانی کوردستان، وەک بزووتنەوەیەکی پیشەیی، یەکێکە لەو ڕێکخراوانەی، کە پێگە و سەنگێکی کاریگەری هەبووە لە قۆناغە جیاجیاکانی تێکۆشانی نیشتمانی و نەتەوەییماندا، لە لایەکی دیکەوە ئەو ڕێکخراوە بە درێژایی تەمەنی شکۆداری خۆیدا قوتابخانەیەکی پێگەیاندنی کەسایەتی تێکۆشەر و دڵسۆز و سەرکردە بووە، بەمەش خزمەتێکی بێ پایانی بواری پیشەیی و خەباتی مەدەنییانە و سیاسییانە و پەروەردەیی لە کوردستاندا کردووە.
ئەمڕۆ لەو هەلومەرجە هەستیارەی هەرێمی کوردستان و ئەو بارودۆخەی لە ئارادایە وا دەخوازێ بە هەموو لایەک و هەموو چین و توێژەکانی کۆمەڵگەکەمان لەسەر ئاستی سیاسی و مەدەنی و کۆمەڵگەییەوە، بەرپرسانە و دڵسۆزانە هەوڵ بۆ پاراستنی ئەو ئەزموونە و سەقامگیریی و ئارامی و دەسکەوتەکانمان بدەین.
لەم بۆنەیەدا پیرۆزبایی گەرمی خۆمان ئاراستەی ئێوە و کادیر و ئەندامانی هێژای یەکێتییەکەتان دەکەین و خەبات و تێكۆشانی ڕێكخراوەكەتان بەرز دەنرخێنین، ھاوکات پشتیوانیی خۆمان بۆ کارنامە و چالاکییەکانتان دووپات دەكەینەوە و هیوادارین وەك هەمیشە دڵسۆزانە و بەرپرسانە زیاتر برەو بە كار و چالاكییەكانتان بدەن و ئاستی پەروەردە و فێركردن بەرزتر و بەرەو پێشتر ببەن بۆ پێگەیاندنی نەوەیەكی هۆشیار و تێگەیشتوو و سوودمەند.
سڵاو و ڕێز و وەفاداریی بۆ دامەزرێنەران و سەرۆك و سكرتێرە پێشەنگەكانی یەكێتیی مامۆستایانی كوردستان.
بەرزو پیرۆز بێت(٦٢)ەمین ساڵیادی دامەزراندنی یەکێتیی مامۆستایانی کوردستان.
مەکتەبی سیاسیی پارتی دیموکراتی کوردستان
١٥ی ئایاری٢٠٢٤