بەرپرسێکی وەزارەتی بازرگانیی هەرێمی كوردستان ئاشكرای كرد، لەپاڵ دابەشکردنی بەشەخۆراکی پێنجەم، ئەم هەفتەیە بەشەئاردی شەشەمی ئاردیش دابەش دەكرێت.
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان، ڕایگەیاند: “گەنممان ناردووەتە ئاشەکان و لەم هەفتەیەدا دەست بە دابەشکردنی بەشەئاردی شەشەمی ئەمساڵ دەكرێت.”
بەپێی ڕێنوێنییەكانی وەزارەتی بازرگانی، هەر هاووڵاتییەك بڕی نۆ كیلۆ ئاردی بەر دەكەوێ.
نەوزاد شێخ کامیل، روونیشی كردەوە: “گەنمی بەشەئاردی شەشەم خۆماڵییە و ئاردەكە پێش ئەوەی بدرێتە هاووڵاتییان، پشكنینی بۆ دەكرێـت و تاقی دەكرێتەوە، پاشان دابەش دەكرێت.”
بەگشتی، هەرێمی كوردستان بۆ بەشەخۆراكی مانگانە، ساڵانە پێویستی بە نزیكەی 650 هەزار تۆن ئارد دەبێ.
بەرپرسەكەی وەزارەتی بازرگانی ئاشكراشی كرد: “ئەو بەشەئاردانەی ئەمساڵ دابەش كراون، پشکنینیان بۆ کراوە و تاقی کراونەتەوە و نانێکی جوانیان لێ دروست بووە، ئاردێک باش نەبێت دابەش ناکرێت.”
سەبارەت بە دابەشکردنی بەشەخۆراک، نەوزاد شێخ کامیل، گوتی: “ماوەی هەفتەیەک زیاترە بەشەخۆراکی پێنجەم دابەش دەکرێت و ڕۆژانە بە ڕێژەیەکی باش بەشەخۆراک دەگاتە لای بریکارەکان و ئەوانیش بەسەر هاووڵاتییاندا دابەشی دەکەن، کە لە چەند مادەیەکی سەرەکی پێکهاتووە.”
شوان بەرزنجی