ژمارەیەك كۆمپانیای وڵاتی ژاپۆن بەمەبەستی ئاشنابوون بە كەشی كاركردن و وەبەرهێنان لە هەرێمی كوردستانن و ساسان عەونی، وەزیری شارەوانی و گەشتوگوزاریش بۆ كۆمپانیا ژاپۆنییەكان ڕایگەیاند: مەسرور بارزانی، سەرۆكی حكوومەتی هەرێمی كوردستان بەردەوام جەخت لەسەر هەماهەنگی لەگەڵ كۆمپانیا بیانییەكان و بە تایبەتی ژاپۆنییەكان دەكاتەوە بۆ ئەنجامدانی كاری وەبەرهێنان و پرۆژەی خزمەتگوزاری لە هەرێمی كوردستان.
ئەمڕۆ دووشەممە 26/2/2024، ساسان عەونی، وەزیری شارەوانی و گەشتوگوزار بە ئامادەبوونی سەروەر كەمال، بریكاری وەزارەتی پیشەسازی و وزە، نوێنەری نووسینگەی سەرۆكوەزیران، د. ئەسعەد بێشەیی، بەڕێوەبەری گشتی و نوێنەری سەرۆكی دەستەی وەبەرهێنان و گەیلان سەعید، سەرۆكی ژووری بازرگانیی هەولێر و ڕزگار عومەر، ئەندامی ژووری بازرگانی و نوێنەری ژمارەیەك لە كۆمپانیا دیارەكانی هەرێمی كوردستان لەگەڵ شاندێكی ئاژانسی جایكا و نوێنەری چەند كۆمپانیایەكی وڵاتی ژاپۆن كۆبووەوە.
لە شاندی ژاپۆن هەر یەكە لە جێن یۆنێدا، بەڕێوەبەری ئۆفیسی جایکا لە عێراق، نوێنەری باڵیۆزخانەی ژاپۆن لە بەغدا و بەڕێوەبەری پێشکەوتووی پرۆگرامەکانی جایکا و نوێنەری حەوت گەورە كۆمپانیای ژاپۆنی ئامادە بوون و حەوت كۆمپانیا ژاپۆنییەكە، بواری وەبەرهێنان و كاركردنی خۆیان نمایش كرد.
ساسان عەونی، وەزیری شارەوانی و گەشتوگوزار خۆشحاڵی خۆی بە دیدارەكە و بە تایبەتی سەردانی كۆمیانیاكانی ژاپۆن بۆ كاركردن لە كوردستان دەربڕی. دواتر تیشكی خستە سەر ڕوانگەی حكوومەتی هەرێمی كوردستان بۆ پاڵپشتی و هەماهەنگی لەگەڵ كۆمپانیا بیانییەكان لە كوردستان. لەمبارەیەوە ساسان عەونی ئاماژەی بەوە كرد: ڕێزدار مەسرور بارزانی سەرۆكی حكوومەتی هەرێمی كوردستان بەردەوام جەخت لەوە دەكاتەوە كە ژینگەی وەبەرهێنان لە كوردستان لەبەردەم كۆمپانیا بیانییەكان كراوە بێت، لەم چوارچێوەیەدا هەموو جۆرە هاوكاری و كارئاسانییەك پێشكەش بە وەبەرهێنەرانی بیانی دەكرێت.
ساسان عەونی، وەزیری شارەوانی و گەشتوگوزار لە بەشێكی تری قسەكانیدا سوپاسی باڵیۆزخانە و كونسوڵگەری ژاپۆن و ئاژانسی جایكای ژاپۆنی كرد بۆ هەموو هاوكاری و هەماهەنگییەك بە تایبەتی ئاژانسی جایكا بۆ هاندانی كۆمپانیا ژاپۆنییەكان بەمەبەستی كاركردن لە كوردستان و تەواوی پاڵپشتیی خۆی و وەزارەتی شارەوانی و گەشتوگوزاری بۆ شاندەكە دووپاتكردەوە.
لە بەرانبەردا بەڕێوەبەری ئۆفیسی جایکا لە عێراق بۆ ئەوەی ڕوونكردنەوەی زیاتر بداتە كۆمپانیاكانی وڵاتەكەی، تیشكی خستە سەر سەقامگیریی هەرێمی كوردستان و باسی لەوە كرد هەرێمی كوردستان ژینگەیەكی گونجاوی بۆ كاركردن هەیە، هاوكات جەختی لەسەر كاركردنی كۆمپانیاكانی وڵاتەكەی و هاوئاهەنگی زیاتر كردەوە.
دواتر تیمی وەزارەتی شارەوانی و گەشتوگوزار لە ڕێگەی داتاشۆوە ڕاپۆرتێكی سەبارەت بە ژینگەی هەرێمی كوردستان و گونجاوی بۆ كاری وەبەرهێنان و پرۆژە خزمەتگوزارییەكان پێشكەش كرد. هەروەها تیمی كۆمپانیاكانی ژاپۆن بە هەمان شێوە بواری كاركردنی خۆیان و ئەزموونیان لە بواری پرۆژەی جۆراوجۆردا خستەڕوو بەمەبەستی ناساندنی ئەزموونی كاریان و ئەو بوارانەی كە دەیانەوێت كاری لەسەر بكەن
هەواڵی پێشوو