سەنتەری میترۆ بۆ داكۆكیكردن لە رۆژنامەنووسان، دوای تێپەڕبوونی زیاتر لە 15 رۆژ بەسەر هێرشەكەی سەر هۆتێل لالەزار لە شاری سلێمانی، ئاشكرای دەكات كە هێزە ئەمنییەكانی یەكێتی هێرشیان كردووەتە سەر ئۆفیسی ژمارەیەك رێكخراوی ناوخۆیی و دەرەكی.
لە راگەیاندراوێكدا كە ئەمڕۆ یەكشەممە 7ی ئەیلولی 2025 بڵاو كراوەتەوە، سەنتەری میترۆ ئاماژەی بەوە داوە كە ”هێرشی چەكداران بۆ سەر نووسینگەی ڕێكخراوە ناوخۆیی و بیانییەكان پێشێلكاریی ڕوونی یاسای مرۆیی نێودەوڵەتیە، مەترسیی ئەوەشی هەیە هەرێمی كوردستان بكاتە شوێنێكی نائارام بۆ كاری رێكخراوی بیانی.“
ئەوەشی خستووەتە ڕوو: ئۆفیسی پایا، دەكەوێتە گەڕەكی سەرچناری شاری سلێمانی، نزیكە لە ماڵی سەرۆكی بەرەی گەل (لاهوور شێخ جەنگی) و هۆتێل لالەزار، چەند رێكخراوێكی كولتووری و ژینگەیی و رێكخراوێكی نێودەوڵەتی لەو تەلارە ئۆفیسییان هەیە، وەك رێكخراوی بەهرەدار بۆ پەرەپێدانی گەنجان، پایا ئەیجنسی، ئارت پلەس، پارێزەرانی ئاوی عێراق و كوردستان، ڕێكخراوی UPP.“
سەنتەرەكە باسی لەوە كردووە كە ڕێكخراوی UPP بە (Un Ponte Per – پردێك بۆ) ناسراوە، ڕێكخراوێكی قازانج نەویستی سەربەخۆی ئیتاڵییە، كار دەكات بۆ دروستكردنی پردی ئاشتی و بەهێزكردنی ڕێكخراوەكانی كۆمەڵگەی مەدەنی لە ناوچە جێناكۆكەكانی وەك عێراق و ڕۆژهەڵاتی ناوەڕاست و باكووری ئەفریقا، لە ڕێگەی پڕۆژەی گەشەپێدانی كۆمەڵگا، گەنجان، بەهێزكردنی ژنان، و پاڵپشتیكردنی پەنابەران.
ئەوەشی دركاندووە: ”بە پێی چەند سەرچاوەیەك كە نەیانوویست ناویان بڵاو بكرێتەوە، بەرەبەیانی هەینی 22ی ئابی 2025، لە كاتی شەڕە خوێناوییەكەی لالەزار لە گردی سەرچناری شاری سلێمانی، هێزی چەكدار هەڵیانكوتاوەتە سەر ئەو تەلارە كە ئۆفیسی ئەو رێكخراوە ناوخۆیی و نێودەوڵەتیانەی تێدایە. ئەمڕۆ زانیمان هێزەكە سەرجەم كەرەستەی ناو ئۆفیسی رێكخراوەكانی بردووە، لەوانەش: قاسەی پارە بەوەی لەناویدا بووە كە پارەی پرۆژەكان بووە، چوار پرێنتەری رەنگاوڕەنگ و رەش و سپی، تەلەفۆنی سەتەلایتی سورەیا، چەند سێتێكی كۆمپیوتەر، نۆ لاپتۆپی جۆراوجۆر، سێتی داتاشۆ، سێ سێتی كامێرای سۆنی و كانون، ئامێری مای فای ئاسیا سێل و فاست لینك و ئای كیو، ئامێری ژماردنی پارە، چەند شاشەیەكی تیڤی، پاسۆرتی كارمەند، چەند هێدفۆنێك، سپیكەر، مۆبایل، و چەندین یوپی ئێس، تا دەگاتە كەرەستەی زۆر زۆر سادەییش وەك: فڵچەی ددانشۆرین و ئامێری ریشتاشینی كارمەندان. لە رێكخراوی تر مەكینەی دروومان، مەكینەی ئۆڤەر و نەخش و ئوتو و درێل و گسكی كارەبا و جزدان بە پارەوە و جانتاشیان بردوون.“
لە بەشێكی دیكەی راگەیاندراوەكەدا سەنتەرەكە ئەوەی خستە ڕوو كە لە كاتی پەیوەندیكردنیاندا ”لەگەڵ ئەوەی زانیارییەكان پشتڕاست دەكرێنەوە، بەڵام تووشی سەرسوڕمان بووین لەوەی كەس ئامادە نییە بە ناوی خۆی و رێكخراوەكەی لێدوان بدات، نزیكەی دوو هەفتەیە بێدەنگن.“
ئەوەشی دووپات كردووەتەوە كە ”هێرش بۆ سەر ئەو باڵەخانەیەی كە ئۆفیسی چەند رێكخراوێكی ناوخۆی و بیانی لەخۆ دەگرێت، زەوتكردنی كەرەستەكانی و بردنی بۆ شوێنی نادیار، هیچ بنەمای یاسایی نییە و پێشێلكاریی ڕوونی یاسای مرۆیی نێودەوڵەتیە و ڕێگریی لە كاری ئەو ڕێكخراوانە دەكات بۆ ئەنجامدانی كارەكانیان، مەترسیی ئەوەشی هەیە هەرێمی كوردستان بخاتە زۆنی سوور بۆ كاری رێكخراوی بیانی.“
سەنتەرەكە باسی لەوەش كردووە كە ”ئەو رێكخراوانە هیچ پەیوەندییەكیان بە ململانێی سیاسی و چەكداریی ئەم دواییە نییە، تا بكرێتە پاساو و بەو شێوەیە دەست بگرن بەسەر كەلوپەلی ئەو رێكخراوانە“، بۆیە داوای كردووە داوای لێبووردنیان لێبكرێت و قەرەبووی زیانەكانیان بكرێتەوە.
بە پێویستیشی زانیوە كە هەموو لایەنەكان، ئۆفیسی ڕێكخراوە ناوخۆیی و بیانییەكان بپارێزن. داواشی لە دامەزراوە میدیاییەكان كردووە، پەردە لەسەر ئەم پێشێلكارییانە هەڵماڵن و بە زانیاریی زیاتر، رای گشتی لێ ئاگادار بكەنەوە.