ئەمڕۆ سێشەممە 2025.12.16، لە ژێرچاودێری ئومێد خۆشناو، پارێزگاری هەولێر و بە ئامادەبوونی بەیان سامی عەبدولڕەحمان، ڕاوێژكاری سەرۆكی حكومەتی هەرێم و د.هێمن میرانی، بەڕیوەبەری گشتیی دیوانی وەزارەتی ناوخۆ و موسا ئەحمەد، سەرۆكی دەزگای خێرخوازی بارزانی و ژمارەیەكی تر لەبەڕیوەبەرانی گشتیی فەرمانگەكانی سنووری پارێزگای هەولێر و نوێنەرانی رێكخراوە نێودەوڵەتییەكان و ڕێكخراوە خۆبەخش و خێرخوازییەكان، لە هەولێری پایتەخت، لەژێر ناونیشانی « خۆبەخشان پایەی سەرەکی هەر کۆمەڵگەیەکی بەهێزن » لەلایەن بەڕێوەبەرایەتی قەیرانەكانی پارێزگای هەولێر بەهاوبەشی UN Volunteers و دەزگای خێرخوازی حاجی ئیدریس سورچی و ڕێكخراوی ئاشتی تەندروستی لوتكەی خۆبەخشی هەولێر 2025 سازدا.
پارێزگاری هەولێر لەو تارێكدا بە بۆنەی ڕۆژی جیهانی خۆبەخشان، وێڕای پیرۆزبایی لە خۆبەخشانی كوردستان بەگشتیی و هەولێری پایتەخت بەتایبەتی، دەستخۆشی لە قەیرانەكانی پارێزگا و هاوبەشەكانی كرد بۆ ئەنجامدانی ئەوكارە و لە پێناو هاوکاری و هاندانی زیاتری كاری خۆبەخشی جەختى لەوەکردەوە ئەوەى لە توانای پارێزگای هەولێر دابێت پشتیوان و هاوکاریان دەبێت و ئومێدى خواست بەهەمان روحیەتەوە بەردەوامبن و نمونەیان زۆر بێت لە کارى خۆبەخشى کە کارێکى مرۆیی مەزنە و دەرەفەتى ئەنجامدانى بۆ هەموو کەسێک ناڕەخسێت.
هەروەها ئاماژەی بەوەدا، كە خۆبەخشی ناوێكی گەورەیە و دەبێت مرۆڤ هەمیشە لەسەر ئەو بابەت و ناونیشانە قسە بکات کە مانایەکی قووڵی هەیە و بە ڕوونی و جوانی و شایستەیی ناو و نیشانەکان باس بکات.
هەروەها پارێزگاری هەولێر، سوپاس و دەستخۆشی لە خۆبەخشانكرد، کە لە ناو قیران و تاقیکردنەوەکاندا ئەرك و كاری خۆبەخشیان ئەنجامداوە، گوتیشی، كاری خۆبەخشی لەناو كورد ڕەگ و ڕیشەی مێژووی هەیە و لەكلتووری كوردیدا لەكاری هەرەوەزی و دەستگیرۆیی و هاریكاری یەكتر بوونی هەبووە و لەو سەردەمەدا پەرەی زیاتری پێدراوە، ڕاشیگەیاند، كاری خۆبەخشی پەیوەستە بە ئەخلاق، مرۆڤایەتی، باوەڕە.
هەروەها كار و چالاكی سەرجەم ئەو رێكخراوانەی لە بوارەكانی مرۆیی و ئابووری و كۆمەڵایەتی و ژینگەیی كاری خۆبەخشی ئەنجامدەدەن، بەرز نرخاند و ئاماژەی بەوەدا پارێزگاری هەولێر هەموو ئاسانكارییەكی پێشكەش كردوون و پێشكەشیان دەكات تاوەكو ئازادانە كارەكانیان ئەنجامبدەن.
لە كۆتایشدا، رێزلێنان پێشكە بە بەشێك لە ڕیكخراوە خێرخوازی و خۆبەخشان كرا.