بەرەبەیانی ئەمڕۆ یەکشەممە، مستەفا کازمی، سەرۆکوەزیرانی پێشووتری عێراق بە سەردانێک گەیشتە شاری هەولێر و لەلایەن پارێزگاری هەولێر پێشوازی لێکرا.
بەپێی زانیارییەکان، بەرەبەیانی ئەمڕۆ 24-5-2026، ئومێد خۆشناو، پارێزگاری هەولێر لە فڕۆکەخانەی نێودەوڵەتیی هەولێر پێشوازی لە مستەفا کازمی، سەرۆکوەزیرانی پێشووتری عێراق کرد.
سەبارەت بە ئامانجی سەردانەکە، بڕیارە مستەفا کازمی لەگەڵ بەرپرسانی باڵای هەرێمی کوردستان کۆببێتەوە. تەوەرە سەرەکییەکانی کۆبوونەوەکانیش بریتی دەبن لە تاوتوێکردنی دوایین پێشهاتەکانی دۆخی گشتیی عێراق و ناوچەکە، لەگەڵ گفتوگۆکردن لەسەر پەرەپێدانی پەیوەندییەکان.
مستەفا کازمی کە لە نێوان ساڵانی 2020 بۆ 2022 سەرۆکوەزیرانی عێراق بوو، لە ماوەی ڕابردووشدا چەندین جار بۆ مەبەستی سیاسی و دیپلۆماسی سەردانی هەولێری کردووە و لەگەڵ سەرکردایەتی سیاسی هەرێمی کوردستان کۆبووەتەوە.