ئێوارەی ئەمڕۆ چوارشەممە، 3ـی حوزەیرانی 2026، لە نێو کەشێکی پڕ لە چالاکی و بە ئامادەبوونی بەرپرسانی حکومی و ژمارەیەکی زۆر لە هاونیشتمانیان، فیستیڤاڵی “بەهارە” لە پارکی شەهید سامی عەبدولڕەحمان لە شاری هەولێر کرایەوە.
فیستیڤاڵەکە لەلایەن ڕێکخراوی “تاک ڤین” و بە ئامادەبوونی ئومێد خۆشناو، پارێزگاری هەولێر و کارزان عەبدولهادی، سەرۆکی شارەوانیی هەولێر و بەڕێوەبەری پارکی سامی عەبدولڕەحمان ڕێکخرابوو. ئامانجی سەرەکیی فیستیڤاڵەکە بریتییە لە دۆزینەوەی دەرفەتی کار، بەرزکردنەوەی ڕۆحی هاوبەشی و پاڵپشتیکردن لە پیشەوەرانی ناوخۆ و خاوەن کارە دەستییەکان.
ئومێد خۆشناو، پارێزگاری هەولێر لە کاتی کردنەوەی فیستیڤاڵەکەدا لە گوتەیەکدا ئاماژەی بە گرنگیی سازکردنی ئەم جۆرە چالاکییانە کرد و ڕایگەیاند: “ئەم فیستیڤاڵانە ڕۆڵێکی کاریگەریان هەیە لە پشتگیریکردنی دەستی کار و بەرهەمی ناوخۆیی. هەروەها هاندەرێکی باشن بۆ ناساندنی بەرهەمەکان و فراوانکردنی بازاڕی کار، کە ئەمەش ڕاستەوخۆ یارمەتیدەری گەشەپێدانی ئابووری و ڕەخساندنی دەرفەتی کاری زیاتر دەبێت بۆ گەنجان.”
هاوکات، بەشداربووانی فیستیڤاڵەکە خۆشحاڵیی خۆیان بە ڕەخساندنی ئەو کەشە دەربڕی و جەختیان لەوە کردەوە کە سازکردنی ئەم جۆرە چالاکییانە، دەبێتە هۆی ئەوەی پیشەوەران بتوانن بەرهەمەکانیان ڕاستەوخۆ بە هاونیشتمانیان بناسێنن.
فیستیڤاڵەکە جگە لە ڕەهەندە ئابوورییەکەی، وەک پەیامێکی ئاشتی و پێکەوەژیان لە پایتەخت دەبینرێت و بڕیارە بۆ ماوەی چەند ڕۆژێک بەردەوام بێت، کە تێیدا چەندین چالاکیی جۆراوجۆر بۆ میوانان و هاونیشتمانیان نمایش دەکرێن.