ئەڤرۆ ل پارێزگەها دهۆکێ، ب هەفکارییا کونسوڵخانەیا گشتی یا هندستانێ و ڕێڤەبەرییا لاوان، رێورەسمێن رۆژا جیهانییا یۆگایێ هاتنە ئەنجامدان، کو تێدا جێگرێ پارێزگارێ دهۆکێ و کونسوڵێ گشتی یێ هندستانێ ئامادەبوون.
رۆژا شەمبی، 20ی حوزەیرانا 2026ێ، ب ئامادەبوونا ماجد سەید سالح، جێگرێ پارێزگارێ دهۆکێ، بڕیجێش کۆمار، کونسوڵێ گشتی یێ هندستانێ ل هەرێما کوردستانێ و هەکار محەمەد ئەمین، ڕێڤەبەری لاوان ل پارێزگەها دهۆکێ، چالاکییا ساخکرنا رۆژا جیهانییا یۆگایێ ب بەشدارییا 36 گەنجێن کچ و کوڕ بڕێڤەچوو.
ساخکرنا ڤێ رۆژێ ل دهۆکێ، پشتی وێ چەندێ دهێت کو پێشتر ل هەردوو پارێزگەهێن هەولێر و سلێمانییێ ژی ژ لایێ کونسوڵخانەیا هندستانێ ڤە هەمان چالاکی هاتبوونە ئەنجامدان.
د رێورەسمان دا، جێگرێ پارێزگارێ دهۆکێ پەیڤەک پێشکێشکر و تێدا بخێرهاتنا کونسوڵ و شاندێ دگەلدا کر. ماجد سەید سالح ئاماژە ب پەیوەندییێن دیرۆکی یێن هەرێما کوردستانێ و وەلاتێ هندستانێ کر و جەخت ل سەر گرنگییا ئەنجامدانا ڤان جۆرە چالاکییێن هەڤبەش د بوارێن جودا دا کرەوه. ناڤبری هەروەسا پشتەڤانییا ئیدارا پارێزگەهێ بۆ هەمی بزاڤێن ب ڤی ڕەنگی دەربڕی و دەستخوشی ل ڕاهێنەر و بەشداربوویان کر.
یۆگا، کو ل سالا 2014ێ ژ لایێ نەتەوەیێن ئێکگرتی ڤە ب فەرمی وەک رۆژا جیهانی هاتە ناساندن، نە بتنێ وەک وەرزش، بەلکو وەک رێگەیەک بۆ دروستکرنا هەفسەنگییا مێشک، روح و جەستەی دهێتە نیاسین. ئەڤ چالاکییە سالانە ل 21ێ حوزەیرانێ ل سەرتاسەری جیهانێ دهێتە ساخکرن، کو رەگ و ڕیشالێن وێ بۆ کلتوورێ کۆنێ یێ وەلاتێ هندستانێ دزڤرن.