بەڕێوەبەرایەتی پۆلیسی پارێزگای هەولێر ڕایگەیاند، دوای بڵاوبوونەوەی گرتە ڤیدیۆیەک کە تێیدا سووکایەتی بە ئاڵای کوردستان دەکرێت، تۆمەتبارەکەیان دەستگیر کردووە و ڕێکاری یاسایی بەرانبەر گیراوەتەبەر.
بەڕێوەبەرایەتی پۆلیسی پارێزگای هەولێر لە ڕوونکردنەوەیەکدا بڵاویکردەوە، دوای ئەوەی گرتە ڤیدیۆیەکی سووکایەتیکردن بە ئاڵای کوردستان لە تۆڕە کۆمەڵایەتییەکاندا بڵاو بووەوە، لەسەر بڕیاری بەڕێوەبەری پۆلیسی پارێزگاکە، دەستبەجێ دەست کرا بە دەستنیشانکردنی ناو و ناونیشانی تۆمەتبارەکە.
وەک لە ڕوونکردنەوەکەدا هاتووە، تۆمەتبارەکە کە بە (ف-ف-ا) ئاماژە بە ناوەکەی کراوە، دەستگیر کراوە و پەڕاوی لێکۆڵینەوەی بۆ ڕێکخراوە. پۆلیسی هەولێر جەختیشی کردووەتەوە کە لە چوارچێوەی ڕێکارە یاساییەکاندا مامەڵەی لەگەڵ دەکرێت.