سەرۆکی کۆمەڵەی پەنابەرە گەڕاوەکانی کوردستان ئاشکرای کرد لەو ٦١ كۆچبه‌ره‌ی لە یەختە نوقومبووەکەدا بوون ١١ کەسیان ڕزگار کراون.
بەکر عەلی، سەرۆکی کۆمەڵەی پەنابەرە گەڕاوەکانی کوردستان، رایگەیاند:” ئەو یەختە ڕۆژی پێنجشەممەی ڕابردوو لە وڵاتی تورکیاوە بەرێ کەوتوە و شەوی ڕابردووتر لە دەریای ناوەڕاستی سنووری کەناراوەکانی ئیتاڵیاوە نوقووم بووە“.
گوتیشی:” ھۆکاری نوقوومبوونی یەختەکە بەرزی شەپۆلەکان و نالەباری کەشوھەوا بووە کە بەداخەوە بەھۆیەوە لە ٦١ سەرنشینی ناوی، ٤٩ کەس خنکاون یان بێ سەروشوێن بوون و ١٢ کەسیش لەلایەن پۆلیسی دەریاوانی ڕزگارکراون و دواتر یەکێک لە ڕزگارکراوانیش گیانی لەدەست دا و ژمارەی گیانلەدەستدان و بێسەروشوێن بووانی یەختەکە بووەتە ٥٠ کەس“.
بەکر عەلی باسی لەوەش کرد:” سەرنشینانی یەختەکە خەڵکی وڵاتی ئەفغانستان و بەشێکی زۆریشیان ھاووڵاتیی ھەرێمی کوردستان و ڕۆژھەڵاتی کوردستان بوون“.
ئاماژەی بۆ ئەوەش کرد:” ھەوڵەکانیان لەڕێگەی نوێنەرەکانیان بۆ ئاشکراکردنی سۆراخ و چارەنووسی ئه‌و كه‌سانه خستووەتە گەڕ“.