کەناڵ و ماڵپەڕەکانی ڕاگەیاندنی نرخی دراو لە ئێران بڵاویان کردەوە نرخی دۆلار لە بەرانبەر پارەی نیشتمانیی ئەم وڵاتەدا گران بووە و جارێکی دیکە سنووری ٦١ هەزار تمەنی تێ پەڕاندووە.
ئاماژەیان بەوەش کردووە، زیادبوونی خواست لەسەر دۆلار لە وەرزی هاویندا، هەروەها نزیکبوونەوە لە هەڵبژاردنەکانی سەرۆکایەتیی کۆماری ئێران دوو هۆکاری سەرەکیی گرانبوونی نرخی دۆلارن.
ڕەوتی هەڵکشانی نرخی دراوی بیانی لە چوار ڕۆژ بەر لە هەڵبژاردنی ئێرانەوە دەستی پێ کردووە و ماڵپەڕی تیجارەت‌نیوز ئاماژەی بەوە داوە، هەڵبژاردنی سەرۆککۆمار گرنگترین سیگناڵە بۆ ڕاکێشانی سرنجی چالاکانی بازاڕی دراو.
بەرزۆ حەقشناس، پسپۆڕی ئابووری، بە ماڵپەڕەکەی گوتووە، نرخی دۆلار کاتێک دادەبەزێت کە کاندیدی خاوەن گوتاری پێوەندی لەگەڵ ڕۆژاوا هەڵبژێردرێت، ئەگەر بەپێچەوانەش ڕوو بدات، هەڵکشانی نرخی دۆلار بەردەوام دەبێت.