ڕاگەیاندنی ئێران بڵاویان کردەوە نرخی نان لە شاری تاران دوو هێندەی نرخی خۆی گران بووە.
ئاژانسی هەواڵی میزان بڵاوی کردەوە، نرخی یەک نانی سەنگەک بۆ ١٠ هەزار تومەن، نرخی یەک نانی بەڕبەڕی بۆ ٥ هەزار تومەن و یەک نانی تەندووریش بۆ ٢ هەزار تومەن بەرزبووەتەوە.
هەواڵی گرانبوونی نان لە تاران لە کاتێکدایە بەڕێوەبەری ژووری ڕێکخراوە پیشەییەکانی تاران دەڵێت، هیشتا هیچ بڕیارێکی فەرمی بۆ ئەم مەبەستە دەرنەکراوە و گرانبوونی جۆرەکانی نان نایاساییە.
مانگی ئایار جێگری وەزیری ئابووریی ئێران بڵاوی کردەوە؛ تێچووی نانەواخانەکان زیاد بووە و لە کۆتاییی مانگی تەمووزیشدا ڕاگەیاندنەکان ئاشکرایان کرد نرخی نان لە ١٠ پارێزگای ئەم وڵاتە گران بووە.
بە گوێرەی زانیارییان لە ماوەی سێ ساڵدا و بە دوو قۆناغ نرخی فەرمیی نان لە ئێران ٧٠٪ زیادی کردووە.