سەرۆكی حكوومەتی هەرێمی كوردستان، پێشوازیی لە وەزیری بازرگانیی عێراق كرد و هاوڕا بوون لەسەر پێویستیی بەهێزکردنی هەماهەنگیی نێوان هەردوو حکوومەتی هەرێمی كوردستان و فیدراڵ.
ئەمڕۆ پێنجشەممە 5/9/2024، مەسرور بارزانی، سەرۆكی حكوومەتی هەرێمی كوردستان، پێشوازیی لە ئەسیر داود ئەلغرێری، وەزیری بازرگانیی عێراق كرد، لە كۆبوونەوەكەدا جەخت لە گرنگیی پەرەپێدانیی هاریکاری نێوان دامەزراوەکانی هەرێمی کوردستان و حکوومەتی فیدراڵ کرایەوە.
هەر لە كۆبوونەوەكەدا، سەرۆكی حكوومەت و وەزیری بازرگانیی عێراق هاوڕا بوون لەسەر پێویستیی بەهێزکردنی هەماهەنگیی نێوان هەردوو حکوومەتی هەرێمی كوردستان و فیدراڵ، بە تایبەتی لە بواری بازرگانی و گەشەپێدانی ئابووری بە لەبەرچاوگرتن و ڕێزگرتن لە قەوارەی دەستووریی هەرێمی کوردستان.
ئاماژە بە پێویستیی پێشکەشکردنی ئاسانکاریی بۆ کەرتی تایبەت کرا بۆ ئەوەی ڕۆڵی کارای خۆی لە بنیاتنان و بەرەوپێشبردنی ژێرخانی ئابووریدا بگێڕێت.
ئامادەکارییەکانی ئەنجامدانی کۆبوونەوەی ئەنجوومەنی ئابووری وەزاریی عێراق کە بڕیارە بە مەبەستی چارەسەرکردنی دۆسێیە و کێشە هەڵپەسێردراوەکانی هەردوولا لەم ڕۆژانە لە هەولێر بکرێت، تەوەرێکی دیکەی گفتوگۆکان بوو.