فەرمانگەی ڕاگەیاندنی حکوومەت لە غەززە ڕایگەیاند، بەرەبەیانی ئەمڕۆ یەکشەممە، هێرشە ئاسمانییەکانی ئیسرائیل بۆ سەر مزگەوتێک و قوتابخانەیەک کە سەدان ئاوارە لە فەڵەستین تێیدا نیشتەجێن، لانیکەم 24 کەس کوژراون و 93 کەسی دیکەش برینداربوون.
ئیسرائیل هێرشەکەی بۆ سەر مزگەوت و قوتابخانەیەکی نزیک نەخۆشخانەی شەهیدانی ئەقسا لە دێربلح لە ناوەڕاستی کەرتی غەززە ئەنجامداوە.
سوپای ئیسرائیل لە بەیاننامەیەکدا ڕایگەیاندووە، “هێرشێکی وردیان کردووەتە سەر چەکدارانی حەماس کە لەناو ناوەندێکی فەرماندەیی و کۆنتڕۆڵدا کاردەکەن.
شایەتحاڵەکان ئاماژەیان بەوەشکردووە، ڕەنگە ژمارەی کوژراو و بریندارەکان بەرزبێتەوە، بەو پێیەی مزگەوتەکە بۆ داڵدەدانی ئاوارەکان بەکاردەهێنرا.
بەپێی ئامارەکانی وەزارەتی تەندروستی کەرتی غەززە، لەسەرەتای هێرشەکانی ئیسرائیل بۆ سەر کەرتی غەززە، نزیکەی 42 هەزار فەلەستینی کوژراون و زیاتر لو 95 هەزار کەسیش بریندار بوون، هەروەها نزیکەی تەواوی دانیشتووانی غەززە ئاوارەبوون کە دوو ملیۆن و 300 هەزار کەس بوون.