یەکێتیی ئەورووپا سێ کۆمپانیای فڕۆکەوانیی ئێران ئێیر، ماهان ئێیر و ساهای ئێرانی خستە لیستی سزاکانییەوە.
لە ڕاگەیاندراوی یەکێتیی ئەورووپادا هاتووە، ئەو سێ کۆمپانیایە مووشەکی بالیستی و درۆنی ئێرانیان بۆ ڕووسیا گواستووەتەوە بۆ ئەوەی لە شەڕی ئۆکراینا بەکاریان بێنێت.
ئاماژە بەوەش دراوە سزاکان ئامانجدارن و یەکێتیی ئەورووپا نایەوێت ترافیکی ئاسمانی و پەیوەندییەکانی خەڵکی ئێران و یەکێتیی ئەورووپا بە یەکجاری ڕابگرێت.
لەگەڵ ئەو کۆمپانیا فڕۆکەوانییانە حەوت کەسایەتی و حەوت دامەزراوەی ئێرانییش خراونەتە لیستی سزاکانی ئەورووپاوە. داراییی ئەو کەسایەتی و دامەزراوانە لە ئەورووپا بلۆکە دەکرێت و کۆمپانیا و ناوەندە بازرگانییەکانی ئەورووپاش ناتوانن هیچ مامەڵەیەکیان لەگەڵ بکەن.
