بۆ پاراستنی سنوورەکانی نێوان عێراق و سووریا، سوپای عێراق بەزرێپۆشەوە بەرەو ئەو ناوچە سنووریانە کەوتنە ڕێ.
یەکە زرێپۆشەکانی سوپای عێراق بۆ توندوتۆڵکردن و پاراستنی سنوورەکانی ئەلقائیم لە باشوورەوە تا سنووری ئوردن بەڕێکەوتن. ئەمەش دوای بەهێزکردنی سنووری کەرتی باکووری ڕۆژئاوای نەینەوا دێت کە بە یەکە زرێپۆشەکان و سەربازەکانی عێراق توندوتۆڵکراوە.
شەممە، 30-11-2024، سوپای سووریا ڕاگەیەندراوێکی لەبارەی شەڕی حەلەب و ئیدلب بڵاو کردەوە و ئاماژەی بەوە کردووە “لە چەند بەرەیەکدا، شەڕێکی سەختیان لەگەڵ هێزە بەرهەڵستکارەکان (دەستەی تەحریری شام و لایەنگرانی) کردووە و فرە بەرەیی پێکدادانەکان وای لێ کردوون هێزەکانیان بکشێننەوە بە ئامانجی دووبارە خۆڕێکخستنەوە.”
سوپای سووریا، جەختی لەوە کردووەتەوە “کشانەوەیان لە چەند بەرەیەک، بۆ ماوەیەکی کاتییە، هێزەکانی پشتیوانی گەیشتوونەتە بەرەکانی شەڕ و خۆیان بۆ هێرشی پێچەوانە ئامادە دەکەن.”