بولەنت ئارینج، یەكێك لە دامەزرێنەرانی ئاكەپە و سەرۆكی پێشووی پەرلەمانی توركیا، پێی وایە براوەی سەرەكی ئەم بارودۆخەی لە سووریا دروست بووە ئیسرائیلە، ده‌شڵێتی: “سووریا زۆر گرنگە، بەڵام ئەمە بە دوعاكردن نابێ و بە عەقڵ دەبێت سوودمەندبین له‌و دۆخه”.
ئارینج، لە تازەترین لێدوانیدا لەبارەی بارودۆخی سووریا، پێی وایە ئیسرائیل تا سنوورەكانی توركیا دێت و هێڵێك دەكێشێت.
ئاماژه بۆ ئه‌وه‌ش ده‌كات: “سوودمەندترین لایەن لەم بارودۆخەی سووریا ئیسرائیلە، ئێرانی وێران كرد و غەززەی پەرێشان كرد، ئێستاش سووریای پەرێشان كردووە، رووسیا بە شەڕی ئۆكڕایناوە خەریكە و ناتوانێت سەری خۆی هەڵبڕێت و ئێرانیش لە بارودۆخێكی شكستدایە و ناتوانێت هیچ شتێك بكات، ئیسرائیل بۆ گەیشتن بە ئامانجەكەی تا سنوورەكانی توركیا دێت و هێڵێك دەكێشێت. سووریا زۆر گرنكە، بەڵام ئەمە بە دوعا و هیواخواستن نابێت، بە عەقڵ دەبێت سوودمەند بین له‌و بارودۆخه.“
هاوكات ئارینج، لە بەشێكی تری گوتەكانیدا، دەڵێت: “گرنگە توركیا كەسێكی شارەزا لە سیاسەت و دیموگرافیای سووریا دەستنیشان بكات، تا راپۆرتێكی گرنگ لەبارەی سووریاوە بداتە سەركۆمار، بۆ ئەمەشیان ناوی ئەحمەد داودئۆغڵو دەهێنێت، كە لادێ بە لادێی سووریا شارەزایە و توركیا بۆ ئەم بارودۆخەی سەری هەڵداوە و دەتوانێت سوودی لێ ببینێت.”