بەگوێرەی هەواڵی میدیایەکی نزیک لە پارتی یەکسانی و دیموکراسیی گەلان (دەم پارتی)، هەفتەی ئاییندە شاندی دەم پارتی کە لە سرری سورەییا ئۆندەر، ئەحمەد تورک و پەروین بوڵدان پێکهاتبوون، بۆ جاری دووەم سەردانی دوورگەی ئیمڕاڵی دەکەنەوە و چاویان بە عەبدوڵڵا ئۆجەلان، رێبەری زیندانیکراوی پەکەکە دەکەوێتەوە. بەگوێرەی هەواڵەکە، لە دووەم کۆبوونەوەدا شاندەکە ناوەڕۆکی کۆبوونەوە سیاسییەکان لەگەڵ ئۆجەلان بەش دەکەن، دواتر دەکرێت لەهەمان کۆبوونەوە هەندێک پێناسەی نوێ بۆ کێشەکان دەکرێت بکرێت و سەردێری نوێ دەخرێنە بەرباس. بڕیارە دوای پارت و لایەنە سیاسییەکان، شاندەکەی دەم پارتی لەگەڵ سەلاحەددین دەمیرتاش و بەندکراوانی سیاسی کۆببنەوە و دواتر راگەیەندراوێکیان هەبێت. دوای ئەو هەنگاوەش بۆ جاری دووەم سەردانی ئیمڕاڵی دەکەنەوە.