لە ماوەی حەوتوویەکدا سەد کەس بە تۆمەتی ئەندامێتی لە ڕێکخراوی داعش دەستگیر کران.
عەلی یەرلیکایا، وەزیری نێوخۆی تورکیا لە تۆڕی کۆمەڵایەتیی ئێکس ڕایگەیاند، چالاکییەکانی گورز-٤١ و گورز-٤٢ لە بیست و چوار پارێزگای تورکیا و باکووری کوردستان بەردەوامن. لەمو ماوەیەدا سەد کەسیان بە تۆمەتی پەیوەندی لەگەڵ داعش دەستبەسەر کردووە.
وەزیری نێوخۆی تورکیا ڕوونی کردەوە دەستگیرکراوان بە چالاکی لە ڕیزەکانی داعش و دابینکردنی پشتیوانی دارایی، هەروەها بڵاوکردنەوەی بانگەشەی ڕێکخراوەکە لە تۆڕە کۆمەڵایەتییەکاندا تۆمەتبارن.
یەرلیکایا هەروەها گوتی: دەستیان بەسەر کۆمەڵێک زانیاری و کەرەستەی دیجیتاڵیدا گرتووە و جەختیشی کردەوە چالاکییەکانیان دژ بە هەموو ڕێکخراوە تیرۆریستییەکان بەردەوام دەبێت.