ئاسایشی هەولێر دەستبەسەرداگرتنی بڕی یەك كیلۆ و 500 گرام مادەی هۆشبەر لە جۆری (هیرۆین)ی ڕاگەیاند و دەشڵێت: لەناو مەجەڵ و تاوەی تیڤاڵەوە بۆ هەولێریان هێناوە.
ئەمڕۆ پێنجشەممە 13ی 2ی 2025، بەڕێوەبەرایەتیی ئاسایشی هەولێر ڕاگەیاند: “دوای کۆکردنەوەی زانیاری و ئەنجامدانی بەدواداچوون لە لایەن تیمەکانمانەوە و بەهەماهەنگی لەگەڵ بەڕێوەبەرایەتیی گشتیی نەهێشتنی مادە هۆشبەرەکان دەستمان گرت بەسەر بڕی یەك کیلۆ و 500 گرام مادەی هۆشبەر لە جۆری (هیرۆین)، کە لەلایەن باندێکی بازرگانیکردن بەمادە هۆشبەرەکان، کە لەدەرەوەی هەرێمی کوردستانەوە، بەڕێگەی کۆمپانیایەکی (گەیاندن و گواستنەوە) دەربازی (هەرێمی کوردستان/ شاری هەولێر)یان کردووە.”
ئاماژە بەوەش دەكات، كە “ئەم مادە هۆشبەرە بەشێوازێکی زۆر شارەزا و لێزانانە لە ژێرەوەی سێتێک (مەنجەڵ و تاوەی تیڤاڵ) حەشار دراوە و بە مادەیەکی ڕەق ڕووپۆش کراوە، بۆ ئەوەی ئاشکرا نەبێت و نە بینرێتەوە.”
ڕاشیدەگەیەنێت، كە “ڕێکاریی یاسایی بەرامبەر کۆمپانیا (گەیاندنە)کە گیرایەبەر و داخرا.”
ئاسایشی هەولێر سوپاسی هاووڵاتییان دەکات، کە هەمیشە لە پێدانی زانیاری هاوكارییانن.