سوپای ڕووسیا لە بەیاننامەیەکدا ڕایگەیاند، هێزەکانیان بە هاوبەشی لەگەڵ هێزەکانی ئاشتیپارێزی سەر بە نەتەوە یەکگرتووەکان، دەستیان بە گەڕی چاودێریی هاوبەش کردووە لە کەناراوەکانی سووریا.
بەگوێرەی بەیاننامەکەی سوپای ڕووسیا، ئەمڕۆ یەکەم گەڕی هێزەکانیان بەڕێوەچووە و ژمارەیەک گوندی دەوروبەری شارەکانی لازقیە و جەبلەی گرتووەتەوە.
لەم بەیاننامەیەدا ئاماژە بەمەش کراوە، ئامانجی ڕووسیا لەم گەڕانە، چاودێریکردنی دۆخەکە، دابینکردنی ئاسایشی هاووڵاتییانی سڤیل، و بەهێزکردنی ئاسایش و سەقامگیریی دۆخی کەناراوەکانی سووریایە.
هەروەها لە بەیاننامەکەدا هاتووە: بۆ چاودێریکردنی ئاسایشی ناوچەکە، گەڕەکان ڕۆژانە لەگەڵ هێزەکانی ئاشتیپارێزی نەتەوە یەکگرتووەکان لە کاتژمێر ٨ی بەیانی تا ٦ی ئێوارە ئەنجام دەدرێن.