ئەمڕۆ شەممە، 3-5-2025 ڕوانگەی سووری بۆ مافەکانی مرۆڤ بڵاوی کردەوە، فڕۆکەیەکی بارهەڵگری هاوپەیمانی نێودەوڵەتی بە یاوەری دوو هێلیکۆپتەری جەنگی، کە کەرەستەی سەربازی و لۆجستی پێبووە لە بنکەی ‘خەراب ئەلجیر’ لە گوندەواری ڕمێلان لە باکووری حەسەکە نیشتووەتەوە.
ڕوانگەی سووری ئاماژەی کردووە، کاروانێکی سەربازی هاوپەیمانی نێودەوڵەتی کە چیمەنتۆ و کەرەستەی سەربازی و لۆجستیان پێبووە، لە کێڵگەی نەوتی عومەر و کێڵگەی غازی کۆنیکۆ لە گوندەوارەکانی دێرەزووری بەڕێکەوتوون و بەرەو بنکەکانیان لە پارێزگای حەسەکە.
بەپێی زانیارییەکانی ڕوانگە، کاروانەکە نزیکەی 25 بارهەڵگری لەخۆگرتبوو کە سیستەمی چاودێری پێشکەوتوو و زرێپۆش و تانکەری سووتەمەنی و ئامێری جۆراوجۆری سەربازی و لۆجستی هەڵگرتبوو.
ڕۆژی پێنجشەممەش، سەرچاوە ناوخۆییەکانی عێراق هەواڵی کشانەوەی کاروانێکی سەربازی هێزەکانی ئەمەریکایان لە سووریاوە بەرە و بنکەی گیارە لە عێراق بڵاوکردەوە.