سەرچاوەیەکی ئاگادار لە تاران ڕایگەیاند، ئێران ئەو پێشنیارەی ئەمەریکای ڕەت کردووەتەوە کە بە مەبەستی گەیشتن بە ڕێککەوتنێکی نوێی ئەتۆمی و لە ڕێگەی وەزیری دەرەوەی عومانەوە پێشکەشی کرابوو.
ئەو سەرچاوەیە بە میدیا ئێرانییەکانی گوتووە، کاربەدەستانی تاران پێشنیازەکەی واشنتن بە “خواستێکی یەکلایەنە و خەیاڵاوی” دەزانن و پێیان وایە هیچ بنەمایەکی دادپەروەرانەی تێدا نییە تا ببێتە هەوێنی ڕێککەوتنێکی هاوسەنگ.
ئەم پێشنیارەی ئەمەریکا دوای ئەنجامدانی پێنج گەڕی دانوستانی ناڕاستەوخۆی نێوان ئێران و ئەمەریکا بە نێوەندگیریی عومان هات، کە تیایدا هەردوولا هەوڵیان داوە بۆ کەمکردنەوەی گرژییەکان و زیندووکردنەوەی ڕێککەوتنی ئەتۆمیی ساڵی ٢٠١٥.
ڕەتکردنەوەی ئەم پێشنیارە لەلایەن ئێرانەوە، جارێکی تر چارەنووسی دانوستانەکان و هەوڵە دیپلۆماسییەکان بۆ چارەسەرکردنی کێشەی ئەتۆمیی ئەو وڵاتە دەخاتە نێو دۆخێکی ناڕوونەوە. چاوەڕوان دەکرێت لە ڕۆژانی داهاتوودا کاردانەوەی زیاتر لەسەر ئەم هەواڵە بێتە ئاراوە و لایەنە پەیوەندیدارەکان هەڵوێستی خۆیان ڕابگەیەنن.