وەزارەتی بەرگری ئەمەریکا لە بەیاننامەیەکدا ڕایگەیاند، پلانی کشانەوەی هێزەکانی ئەمەریکا لە عێراق لە چوارچێوەی ڕێککەوتنەکاندا بەردەوامە، ڕەتیشی دەکاتەوە هیچ گۆڕانکارییەک بەهۆی پێشهاتە سیاسی و ناوچەییەکانی ئەم دواییە بکرێت.
پێنتاگۆن باسی لەوەش کردووە، ئێمە لەسەر هەمان ئەو ڕێگایەین کە لە بەیاننامە هاوبەشەکەی ئەیلوولی 2024دا لە نێوان ئەمەریکا و عێراقدا دەرچووە.
ئەم وەڵامە لە کاتێکدایە کە گفتوگۆکان لە چوارچێوەی لیژنەی باڵای سەربازی هاوبەشی نێوان بەغدا و واشنتن بەڕێوەچوو، کە لە ساڵی 2023 پێکهێنرا بۆ تاوتوێکردنی داهاتووی سەربازانی ئەمەریکا لە عێراق و دیاریکردنی میکانیزمی گواستنەوەی پەیوەندییەکە لە چوارچێوەی شەڕەوە بۆ هاوکاریی ئەمنی دوولایەنە، لەوانەش مەشق و پاڵپشتیی هەواڵگری.
ئێستا بوونی سەربازانی ئەمەریکا لە عێراق بەسەر چەند بنکەیەکدا دابەشکراوە، دیارترینیان عەین ئەسەدە لە ئەنبار، ژمارەی سەربازە مەزەندەکراوەکان نزیکەی دوو هەزار و 500 سەربازە، ئەرکەکانی پەیوەست بە بەرەنگاربوونەوەی پاشماوەکانی داعش و پێشکەشکردنی پشتیوانی لۆجستی بۆ هێزە عێراقییەکان، لە چوارچێوەی هاوپەیمانی نێودەوڵەتیدا ئەنجام دەدەن.