فوئاد حوسێن، وەزیری دەرەوەی عێراق و سەعید خەتیب زادە، جێگری وەزیری دەرەوەی ئێران پەیوەندییە دووقۆڵییەکانی نێوان هەردوو وڵات و رێگاکانی پتەوکردنیان بۆ خزمەتکردنی بەرژەوەندییە هاوبەشەکان تاوتوێ کرد.
بەپێی راگەیەندراوی وەزارەتی دەرەوەی عێراق: “خەتیب زاده باسی له دۆخی شەڕ لەکاتی دەستدرێژیی ئیسرائیل بۆ سەر ئێران و کاریگەرییەکانی لەسەر سیاسەت و کۆمەڵگای ئێران کرد.”
خەتیب زاده جەختی لەوە کردەوە کە “ئەم دۆخه لە دووبارە داڕشتنەوەی چەمکە ئەمنی و سەربازییەکان و هەروەها رێبازی سیاسی لە پەیوەندییە نێودەوڵەتییەکانی ئێراندا رەنگدانەوەی هەبووە”.
بەگوێرەی بەیاننامەکە، هەردوولا “ئەنجامی دانوستانەکانی ئێران و ئەوروپا و گفتوگۆی بەردەوامی لەگەڵ وڵاتانی ترۆیکا (بریتانیا، فەرەنسا و ئەڵمانیا)یان تاوتوێ کرد، جگە لە تاوتوێکردنی ئەو هەڵوێستانەی لە ئەنجومەنی ئاسایشی نێودەوڵەتی خراوەتەڕوو، بەتایبەتی سەبارەت بە رۆڵی چین و رووسیا لە پرسەکانی پەیوەست بە ئێران.”
“فوئاد حوسێن جەختی لە پەرۆشیی عێراق کردەوە بۆ پاڵپشتیکردنی دیالۆگ و لێکتێگەیشتن بەشێوەیەک کە بەشدار بێت لە بەرزکردنەوەی ئاسایش و سەقامگیری لەسەر ئاستی هەرێمی و نێودەوڵەتی.”