ئەمڕۆ پێنجشەممە لەدوای کردنەوەی بازاڕەکانی ئاسیا نرخی نەوت درێژەی دا بە دابەزین ،یەک بەرمیل نەوتی برێنتی دەریای باکوور، 27 سەنت دابەزی و بە 67 دۆلار و 33 سەنت مامەڵەی پێوەکرا.
نرخی یەک بەرمیل نەوتی سووکی تەکساسی ئەمریکاش 28 سەنتی دیکەی لێبووەوە و بە 63 دۆلارو 69 سەنت مامەڵەی پێوەکرا.
نرخەکانی نەوت بەهۆی چاوەڕوانییەکان بۆ زیادکردنی خستنەڕووی نەوت لەلایەن بەرهەمهێنەرانی نەوتی ئۆپێک پڵەسەوە بەڕێژەی 2٪ دابەزی.
لەلایەکی دیکەوە، سەرەڕای ئاژاوە و گرژییەکانی رۆژهەڵاتی نێوەڕاست، هێشتا خستنەڕووی نەوت نەپچڕاوە و کێشەیەکی ئەوتۆی بۆ دروست نەبووە، ئەوەش بە شێوازێکی گشتی کاریگەری لەسەر نرخی نەوت داناوە.